投資特攻隊喺今個周末轉玩日本波，我青蛙仔不嬲對日職聯有研究，於是就由我孭飛。喺諗過度過之後，揀咗大阪飛腳，博佢哋翻轉東京，贏FC東京結束3場不勝走勢。冷選就玩德國波，由戰友吾中推介科特布斯喺升班馬大戰對亞琛坐和望贏。文：青蛙仔
日職聯已經打咗27輪，仲有7輪就玩完，基本上得番頭3位嘅浦和紅鑽、大阪飛腳同川崎前鋒有得爭；而本來飛腳一直領先，點知佢哋最近好似撞咗邪咁，係咁失分，近3場唔見咗8分，俾紅鑽反超前5分。呢個禮拜六紅鑽會對前鋒，所謂「鷸蚌相爭，漁人得利」，若然由前鋒贏波，只要飛腳喺禮拜日推冧個東京鐵塔，佢哋同紅鑽嘅距離會縮減至兩分。
播戶龍二重拾射門鞋
睇番飛腳個陣容，佢哋有中場遠藤保仁因為個肝有事而提早收「咧」，但其他主將好似後衞加地亮、隊長宮本恒靖、中場二川孝廣及前鋒播戶龍二等都可以上陣，換句話講可以強陣出征東京；而喺今屆聯賽入咗15球嘅播戶龍二之前因代表日本踢友賽同埋亞洲盃，球會同國家隊兩邊走，影響咗喺聯賽嘅演出，上場對橫濱水手更只係打咗78分鐘就被換出；經過成個禮拜嘅休養生息後，相信可以重拾射手本色。
FC東京現時排尾5，但多尾3嘅京都不死鳥成10分，原則上冇降班威脅，講戰意應該及唔上飛腳；而前一仗佢哋作客贏名古屋八鯨終止聯賽6連敗，點知原來係虛火，上場俾尾4嘅廣島三箭數5:2；再睇埋個陣，原本佢哋已經同飛腳爭一班波，家陣仲有後防主力尚卡奴因坐波監停賽，真係同飛腳冇得揮。
吼科特布斯坐和望贏
冷選方面，戰友吾中推介兩支「升班馬」亞琛對科特布斯嘅較量，認為科特布斯可以坐和望贏。亞琛同科特布斯今屆升班後表現就差天共地，亞琛愈踢愈好，近5場聯賽贏4場，目前排第4，都咪話唔威，而科特布斯則表現一般，得8分排第13，周六時亞琛更有主場之利，被睇好唔難理解。
不過，其實論實力兩隊差唔多，亞琛係上屆德乙亞軍、科特布斯係上屆德乙季軍，加上科特布斯近4次訪亞琛共1勝1和2負，成績唔算失禮，喺熟悉亞琛路數下，科特布斯受讓一球，「客勝」實在筍。
投資特攻隊金句
大阪飛腳今屆未試過衰多過3場，加上要保爭標希望，呢場作客FC東京，3分執硬。