道指果然犀利，在各方（包括筆者）努力吶喊下，前晚賈其餘勇，甫開市便上破12,000點，再創歷史新高（12,049.51）。Bravo！
道指借一個溫和的消費物價指數，如坐火箭般升近百點，一舉衝破萬二，將所有"stop-loss"盤殺晒。yummy-yummy後急速回落，跟住就無力「挽」，中段更曾一度見「紅」（包括future），好在尾市力托回至正數，不然好似納指般「頹」，便認真醜死怪了！
道指掂一掂萬二便立即回落，其實早有「不祥之兆」。有讀者肯定會問：何出此言？
鬼咩，如果有睇CNBC，當晚有靚女主播見道指快將衝上12,000點之際，即刻將一頂一早準備好、並寫上12000的紙摺帽戴在頭上。豈料尚未戴得穩，便跌咗落地下，汝道這現象是否不祥之兆？難怪在道指帶動下，美股3大指數連埋future之後一度見「紅」。唔好話「鬼佬」唔信邪?!
然而，道指能輕易超越萬二，其實單靠一隻全道指成份股中最大「冧巴」（股價最高）的IBM勁升超過4%至90美元之上，已能圓其好事。相信是本欄忠實讀者一定知道，創於1896年的DowJonesIndustrialAverage，是以股價升降比例來衡量其升跌，並非如其他股市指數般以市值計算，故經常使出「單天保至尊」的伎倆。早前推隻Altria，然後是波音，之後強生和IBM，次次擺隻「單天」已夠殺，問你服未？
入市要學hitandrun
又有人會問：「喂，冠一，你一邊唱好，一邊又話『政治市』叫人小心，近兩日仲叫揸番多啲現金，究竟葫蘆裏賣甚麼藥？」
看官，trendisfriend，明知「政治市」又怎能不唱好，共和黨贏梗㗎？現時最好hitandrun，愈來愈近大選，還不揸多點現金，你游水好叻咩?!