今個星期老廉「塔走」中原地產高層，調查收受回佣事件震驚代理界，中原老闆施永青話呢行有好多蠱惑招，但係傳統做落嚟嘅。《香港討論區》網友龍生噚日咁啱問起代理食價算唔算犯法問題。佢舉例話：「業主放售一單位，叫價128萬，個地產睇過該單位後認為唔止呢個價，幫佢個單位標高至150萬（咁啱有人睇到想買），咁跟住個地產搵個老友幫手，用128萬先買咗個單位，持有21日後賣番畀嗰位肯出150萬去買嘅買家，從中賺取差價。」
網友Cantona2001認為：「noproblemwor，it'sjustbusiness，why業主叫價128萬，not150萬。」網友redots就講：「賣之前睇吓landsearch就唔會俾人呃！唔排除128萬已經係好價，最緊要你覺得OK。人哋150萬買係人哋嘅事。做agent係有呢啲着數，見到平嘢可以買咗先......」citykym亦都話：「告得入先至奇，呢啲係自由市場......」
牽涉代理串謀行騙
但臭作2006好似專家咁話：「錯了，呢個case一定告得入，呢啲叫做食差價。N年前電視都有播過，係犯法嘅，地產代理條例講明唔可以咁做的。不過𠵱家一定要證明一樣嘢，就係個地產代理係同中間人串謀，以此手法賺取差價，但一般都告得入，樓主可以先查詢吓地監局，你上網搜尋（地監局）就會有電話。問吓你可以點做。」
地監局話代理如喺買賣過程中「食價」，沒有事先向客戶披露有關利益，就可能違反「常規規例」及《操守守則》，要受紀律處分。黃鶴鳴律師話，其實無論買方或賣方，如覺得代理喺買賣過程中有疏忽，不能盡責保障佢哋嘅權益，都可循民事訴訟向代理追討賠償。至於上述個案食價問題，可能牽涉到代理串謀行騙行為，咁就屬刑事案。