自從前妻肥姐沈殿霞入院後，鄭少秋抽多咗時間同個女欣宜見面，仲帶埋佢同太太官晶華生嗰兩個寶貝女，四父女一齊去睇戲敍天倫，點知就傳出官晶華好唔高興，秋官即刻出動銀彈攻勢，買新車𠱁老婆，佢當時仲解畫話係因為「車舊咗咪要換咯」，並非慰妻。
之但係噚日秋官終於忍唔住大吐苦水，話老婆大人除咗係購物狂外，仲成日發老脾。
爆肥姐血壓高
秋官噚日同徐子珊喺將軍澳電視廣播城排舞室為《我們的世紀金曲》排舞，講起官晶華，秋官話：「成日搵我發脾氣，咪畀佢自己鍾意買乜嘢就買乜嘢囉，佢又揀來揀去，冇呀，咪等佢自己揀，失晒控，好慘！」咁樣話老婆，唔怕扭耳仔咩？秋官話：「點會？咁講佢威，即係尊重佢，點會嬲？個個都想控制自己個男人！」
講番肥姐個病，秋官話：「噚日同個女（欣宜）通電話，完全正常，同埋受到控制，血壓係比指數高啲，不過對於佢個情況係好嘅。」
至於同場嘅徐子珊就話自己係第一次做秋官嘅舞伴，所以心情緊張，𠵱家仲積極減肥，佢話：「我唔怕辛苦，我已經不斷keepfit，最緊要係好睇。」
