恒隆地產主席陳啓宗，自公布要用300億元成為最強大陸收租股後，已成功被市場「歸納」為大陸地產股，好似噚日，香港地產股無論發展商定收租股都全線下跌，但恒隆卻不跌反升。四出向各地基金經理推介恒隆地產嘅陳啓宗重臣吳士元功不可沒。
佢前日喺新加坡做完路演返港，噚日剛好係佢生日，本應休息吓兼同愛妻慶祝，點知佢走去約幾個記者行家吹水，講集團強攻大陸嘅大計已經逐步實現，更重要係帶埋集團最新年報出嚟畀大家。
其實藍籌地產公司中，陳啓宗都算係異數，每年喺年報寫《主席的話》，洋洋幾千字，大講集團未來發展鴻圖之餘，又分析香港樓市、經濟。
老闆咁落心機，作為重臣嘅吳士元亦都好識做，特登將主席的話另外輯錄成一本書仔派畀投資者，佢仲話諗緊明年一次過將老闆喺過去五年寫嘅《主席的話》輯錄成書，真識做！