馬主P與中貿林、左丁山輸完馬之後，未到散場已經鬆人。中貿林就一路吼到第九場，大注扑落八號馬「小武士」，卒之收復失地，開開心心回家去。左丁山碰到資深大馬主T，佢話養馬賭馬近四十年，乜嘢未見過，馬主輸馬閒過立秋，叫左丁山等人睇開啲。
馬主T養馬多年，近來減少馬場曝光率，自己隻馬跑完就鬆人。左丁山回心諗吓，馬主T冇拉頭馬已經有一年以上，以佢一家人養馬之多，勝出率實在低，唔似得養兩隻馬嘅葉美貞，憑「鴻運至尊」與「神勇至尊」，逢出必勝，今季已經拉咗三次頭馬。
馬主T話近五六年來，佢買馬費接近三千萬，呢筆購馬成本（capitalcost）已經全部撇賬，冇所謂之至，最弊係贏馬甚少，養馬費幾百萬元，搵唔番，呢排覺得自己年紀有咁上下，故此有意逐漸淡出馬圈，等班後生仔玩。佢話香港馬會需要馬主，但馬主被視為人微言輕，馬伕嘈，馬會緊張，馬主嘈，馬會愛理不理，此令佢大惑不解。
既然養馬咁耐，有乜相馬心得呢？馬主T歎曰：「我學識咗好多嘢，但仍然要靠運氣。我好多年前到紐約拍賣會買馬，因自己冇經驗，舉手舉到六萬美元就膽怯，卒之俾人買咗我自己睇中嘅馬，呢隻馬後來贏咗幾場級際賽，有配種價值，自己恨到揼心口。第二次參加拍賣會，唔理咯，一於追價，十萬美元投到一隻心頭好。隻馬一出就贏五個馬位，大練馬師當晚打電話嚟，畀我三十萬美元，要我讓隻馬畀佢，我唔肯。出第二場，隻馬贏七個馬位，大練馬師又打電話嚟，願意出價五十萬美元。我心諗，著名大練馬師肯出高價搶，隻馬可能有潛質贏到肯得基打吡，邊肯出讓呀！於是一口拒絕。出第三場，成為大熱門，出閘時受驚起擒，踢傷隻腳大敗，此後無人問津，我得一場空歡喜，到今日仍然覺得好遺憾。世事嘅嘢，有幸運之神主宰，並唔係你以為高價買到一隻血統型格上佳嘅馬就一定贏到大賽嘅。」