買樓呢家嘢，好多時都係講心水，蘭西經常聽聞有業主為奪「心頭好」，不惜一擲千金，聽世紀21日昇地產黃文龍講，北角最近又有一宗。
成交單位係北角海峰園高峰閣極高層G室，面積960方呎，以772萬易手，呎價8042蚊，而同類型較低層嘅單位大約賣緊560萬，買家足足畀多212萬銀，即貴近四成。
黃文龍話，買家一向住開紅磡黃埔海景單位，對其他景觀完全冇興趣，加上佢之前向隅買唔到北角慧雲峯海景單位，難得今次畀佢碰到海峰園呢個可以望晒全維港煙花海景嘅單位，所以唔介意畀多些少錢，即刻「嗱嗱冧」扑槌。至於原業主，88年以180萬買入，多得呢位大豪客，帶挈佢勁賺592萬。
另外，美聯黎亮文亦報料，青衣盈翠半島同樣有高價成交。3A座高層G室，一個望海景嘅646方呎單位，以317.6萬沽出，每呎4916蚊，較市價高約7%，不過，上手業主就蝕咗9.4萬。
原來買家正正係隔籬屋嘅業主，佢買入呢個單位，目的係想自製相連戶，既唔使搬出搬入，地方又住大咗，聽落都幾爽。
電郵地址：[email protected]