最近銀行界嘅「分唇」多籮籮，渣打差唔多隔日就見記者，中銀都見咗次，噚日花旗亦有搞作。花旗聯同香港科大商學院，搞咗個案例分析比賽，要17隊分別由四大洲來港嘅大學生，喺30個鐘之內，對公司案例進行深入研究同分析，仲要畀埋策略性建議㖭。
究竟邊間公司咁有幸俾人揀中呢？咪就係人人都識，可能一日早午晚三餐都會幫襯嘅大家樂囉。其實主席陳裕光之前都講過，芳齡20嘅大家樂，股價由上市到𠵱家升咗近10倍，成績已經非常驕人。今次有班未來精英獻計，話唔定股價有望再創高峯。
講番個比賽，科大代表有少少失威，輸咗個馬鼻畀加拿大西安大略大學。如果下次研究麥記，科大可唔可以收復失地呢？