《名采》間唔中都介紹嘅「蘭香園」，老闆王漢榮今年54歲，係第二代揸Fit掌門人，「老父喺69年頂呢間舖，嗰陣佢60幾歲可以退休，頂呢盤生意好大程度係為咗我哋將來生計。嗰陣時，我凌晨5點起身開舖直踩到朝早9點返學，下晝4點放學再返舖頭開工，做到凌晨12點收舖，每日做20個鐘瞓4個鐘返足7日，做唔夠幾個月就入廠，矇矇矓矓喺病床聽到阿爸講：『寧願要番個仔都唔要間舖！』好感人㗎。」
唔踢爆唔得，原來鍾偉民同阿Pink都係「蘭香園」熟客，不過咪以為係老闆老土放風博宣傳，事關我真係喺餐廳撞過兩位不下數次。「食方面，佢兩個好多時都唔跟餐牌叫嘢食；煮方面，佢哋久唔久會有新諗頭，好似我哋個碎蛋三文治，就係大師兄（鍾偉民）教我用10隻雞蛋加1隻鹹蛋打成蛋漿，好多客食過都話好惹味。」王漢榮雖然年紀大，但仲雄心壯志：「我想將茶餐廳推高一個層次，做到酒席菜式。」又真喎，好似蒸籠荷葉鮮蝦飯呢啲高價菜，好難想像茶餐廳有得賣，「我仲諗到用中式酒席菜式搞到會服務，唔使一味菠蘿腸仔……所謂樓面有限，外賣空間絕對無限嘛。」
記者：朱崇德
攝影：譚盈傑
碎蛋三文治$11
碎蛋即雞蛋加鹹蛋，咬落不但蛋香豐富，咬咬吓又會有陣鹹蛋味走出嚟，好惹味。
紅酒木瓜燴牛尾3磅$168
紅酒燴牛尾就食得多，加木瓜未試過，原來木瓜有「植物味精」之稱，加木瓜燴牛尾會更香甜。
三代同堂$22
腸粉出晒名，皮薄到透明，秘訣係即叫即整，以呢個集大蝦、蝦米同蝦子嘅自創菜式最掂。
海鮮包3磅$168
用生菜包形式做墨魚、冬菇卷，係專為公公婆婆而設嘅到會菜式，無骨，唔使點𡁻就可以吞落肚。
蘭香園（23896443）
地址：牛頭角道273-275號地下
