鄧萃雯前晚在屯門拍攝新劇，被追問奪無綫台慶最佳女主角獎的信心時，雯女強調今次是最後一次講。至於被牽涉入撐胡杏兒倒佘詩曼的是非中，雯女坦言自己睇好的只有蘇玉華。
鄧萃雯、宣萱、苗僑偉及馬德鐘等前晚在屯門黃金海岸拍攝劇集《歲月風雲》，劇情講述眾嘉賓盛裝出席劉江的壽宴。於戲中鄧萃雯和苗僑偉飾演夫妻，雯女表示今次飾演少奶奶，每天都是飲茶和購物，與以往的女強人角色有別。
「之後唔再講」
無綫台慶將至，每年都有不少爭獎是非，雯女被問到今年憑劇集《女人唔易做》有份競逐最佳女主角獎的信心，她說：「年年都有份，有劇就有提名。」其後她被問到有點不耐煩，續說：「呢個問題相信由亮燈問到台慶嗰日，我𠵱家同大家講最後一次，之後唔再講，畀我攞到，我同自己講畀心機，會繼續努力；如果攞唔到，我又會同自己講，畀心機，繼續要努力，攞唔攞到我心境都一樣，冇分別。戲就拍咗，又播埋，啲錢又使埋，所以我冇再諗。」
有報道指她們一眾藝人撐胡杏兒倒佘詩曼，雯女說：「我冇人特別睇好囉，胡杏兒套劇又未播，覺得好無聊。如果要我揀，我會揀蘇玉華，我有睇佢套劇；而男嘅我就揀賤Man（謝天華），因為我同佢拍，覺得佢做得好好，不作他人之選。」那麼被指倒佘，雯女說：「唔好問我關於人哋嘅事，我只會答自己嗰part。」
馬德鐘認老博獎
此外，跟佘詩曼合作拍《鳳凰四重奏》的馬德鐘，提及女主角爭獎是非時說：「年年係咁啦，主角換咗其他人啫，當故事咁睇。」問他會否跟佘詩曼傾談，他說：「佢身經百戰啦，佢知個遊戲規則。」他還力撐阿佘，睇好對方是女主角人選。
雖然同是憑《鳳》劇爭最佳男主角獎，但馬德鐘自嘲也是無緣得獎，他說：「舊年網上投票都係我領先，我就冇獎，今年到𠵱家都係我領先，不過相信落敗嘅可能性都好大，我喺TVB已經13年，男仔之中未攞嘅應係我最耐，所以應該畀我先。」
採訪：楊潔雯
攝影：陳偉權
