噚日，孫柏文講過同大家研究曾蔭權特首施政報告裏面啲政策，不過適逢噚日立法會辯論吸煙修訂條例，我就先想同大家講呢條法例。大家好多時候聽到任何特區市民（包括立法會議員在內）推銷喺公眾場所全面禁煙，都會聽到以下的一句：「禁煙係世界大潮流，個個先進國家都實施公眾場所全面禁煙嘅政策，所以如果要香港先進啲、文明啲，我哋都要公眾場所全面禁煙。」
不過，我想同大家講世界上有一個非常先進嘅民主國家，不但冇全面禁煙，仲要就算國民大多數都唔食煙，絕大多數嘅國民都係反對公眾場所全面禁煙，所以一路都冇通過任何法例禁煙。大家可能會問：「先進國家喎。國民大多數反對禁煙？相信孫柏文你搞錯！」冇搞錯！呢個國家就係德國，應該夠先進啦？大家可能會問點解佢哋居然會反對禁煙，原因其實都好簡單。
其實全球第一個公眾場所全面禁煙嘅國家，就係德國，不過係希特勒納粹統治嘅德國。當年，希特勒又係好似郭家麒、鄭家富等立法會議員，大喊要保護市民健康、製造「完美」社會，所以實施公眾場所全面禁煙嘅政策。德國人民知道，如果你可以見到係全場成人、全場你情我願嘅情況之下有人食煙，等如個社會仲係包容。只要個社會仲容許食煙，個社會就仲未邁向盲目追求「完美」。因為追求「完美」嘅結果令到數百萬個猶太人、吉普賽人、同性戀者、異己分子遭到系統性嘅「淨化」。
試想想，一個好似鄭家富患有「肛門堵塞症」anallyretentive嘅人統治香港，包容就會從此消失。如果有「專家」話肛交對身體有害，你估鄭家富會唔會要求重罰男同性戀者？太誇張？ok，如果有「專家」話香港市民休息不足，你估鄭家富會唔會要求最高工時？真正要反對禁煙嘅理由，係遠比任何經濟理由大。各位市民，呢啲就係我哋選出來嘅代表！08年知點做啦？
「假奶粉」般嘅「學券制」
講番施政報告，我作為一個佛利民MiltonFriedman（好崇尚同好希望全世界都抄香港「積極不干預」政策嘅諾貝爾經濟獎得主）fan屎可以同大家講，曾特首放棄「積極不干預」都只會令到佛利民痛心疾首、滿淚盈眶。今次曾特首「假奶粉」般翻版貨嘅「學券制」，先至係令佛利民佢老人家暴跳如雷嘅新搞作，因為完全強姦「學券制」精神。
無他嘅，因「學券制」嘅神髓就係學校最終教書方針同模式，就係由辦學團體因應學生嘅需要自由決定去做，結果會令「教好學生」變成教育唯一考慮，真正嘅「學券制」只會考慮學生，而唔會考慮老師飯碗、心繫家國、政治正確、牟利邪惡等等嘅因素。孫柏文想今日問李國章局長，你作為一個家長，你當年為自己嘅小朋友選擇學校嘅時候，除了問一句：「IsthisthebesteducationIcangetformychildren？」之外，會唔會因教得最好嘅學校係「牟利」所以唔畀自己嘅小朋友讀？最後李局長係來自一個大家族，我想問李局長有幾多個百分比嘅姪仔姪女，係生活於教統局之下？如果唔係100%，點解唔可以畀其他香港嘅家長一張「學券」，等佢哋嘅小朋友都可以好似李家族一樣，逃離教統局嘅魔掌？