乜時下仲有人咁儍，買MP3機嚟聽歌？係都買iPod，聽得又睇得喇！的確，iPod今時今日雄霸天下，自認夠潮都會買部傍身。不過大家唔覺次次要用《iTunes》轉格式，過程好煩咩？所以一部好款兼有特別功能嘅MP3機，依然有市場價值。好似索記新出呢部NW-S203F，防水兼具跑步計算功能，真係落住雨喪跑都冇問題！
編導：陸俊雄 攝影：陳陶鈞
演出：King、Geneieve
愛的馬拉松
King暗戀好友Gen多年，一直唔敢表白，怕破壞二人現時好友關係。不過今日大事不妙，事關阿Gen要去法國讀書三年！King心諗：「Gen成日話啲Mix嘅BB好得意，到時識個施丹，結婚生埋仔咪弊！」於是二話不說，飛的搵阿Gen盡訴心中情。
可惜天意弄人，趕時間先嚟落雨仲玩埋大塞車。King心急如焚，決定喪跑誓要喺Gen坐車去機場前表愛意。不過呢位癡漢都幾搞笑，講到十萬火急咁都仲帶埋索記新出嗰部NW-S203FMP3機，仲邊跑邊講：「我要俾佢睇到我嘅誠意！」
向目標奮力跑
又唔係送花有鑽戒，何來睇得到嘅誠意？原來佢喺部MP3機度做咗手腳，落車喪跑前輸入自己嘅身高、體重、步行步距，同跑步步距，利用內置跑步計算功能，計住佢跑咗幾多步、幾多公里，及消耗幾多卡路里。原來King個衰仔諗住玩愛情馬拉松，扮晒有毅力追女仔，佢仲話：「好在NW-S203F係生活防水，如果唔係落雨淋壞部機，我啲數據咪冇晒！」
起勢跑！原來聽住歌嚟跑真係唔覺攰，仲愈跑愈起勁，唔怪之得喺維園、運動場之類，成日見人聽歌喪跑十幾個圈。King跑到口都亁咁話：「好在部機仲有個『MusicPacer』功能，快跑時會播自己預設嘅快歌，放慢腳步時又會播番節奏慢啲嘅歌。一聽到播慢歌，即係唔夠肉緊，提醒我快馬加鞭。」
扭吓擰吓揀歌仔
喺死追爛追下，King終於趕得切見阿Gen，話送部MP3畀女方帶上機聽之餘，仲講自己跑得好辛苦追嚟，有晒愛的印證咁話。不過Gen好似無動於衷，淨係猛話部機好輕；聽歌可分單曲同資料夾嚟揀，靠晒個旋轉開關，推左推右、上下轉動嚟揀歌，操作夠晒簡易。
轉模式如搖試管
King仲話：「用手搖呢支試管三次，播放模式就會變。例如本來正常次序播歌一次，經阿Gen一搖，變成所有歌曲隨機重複播放。」件嘢咁神奇！原來佢內置咗個「GSensor」，詳細嚟講係叫做「距離和重力加速度感測器」。King就係因為佢先計到步頻，按步速轉歌等。男嘅死唔斷氣咁講解，女就係咁笑；King以為女方因為臨走有禮物收，先有咁嘅反應。實情Gen俾King冒雨跑九條街嘅誠意打動咗，由心笑出嚟啫！
花絮：7人營造雨中浪漫
影相前一日都仲落雨，以為有齊天時、地利、人和啦，點知到咗正式拍攝當日，好天到不得了！惟有玩人造雨先做到想要嘅效果。結果筆者拉埋編輯，再加攝影部三名大漢，夾埋兩位交到戲嘅Model，先至影到今日呢輯靚相咋。
PROFILE：
記憶容量：1GB
播放時間：連續播放17小時
電池：內置專用鋰電池
體積：15×96.5×15mm
重量：26g
查詢：SonyStyle（23452966）
