致力於「幫助封閉的社會開放，促進開放的社會更開放」嘅索羅斯，噚日響韓國透過衞星線路，喺奧斯陸嘅採掘行業透明度行動計劃（EITI）年會上再向俄羅斯、中國同印度隔空發炮。
佢話，隨住能源價格近來動盪不斷，國際石油企業嘅影響力，正轉移到呢啲國家嘅油企手上，後者近年不惜一切響世界其他地方收購油田資源，呢個情況已經削弱世界銀行、國基會等全球金融機構追求透明度嘅影響力。
何解？呢位國際大炒家解畫話，因為中國同印度響唔同程度上破壞能夠帶嚟更大透明度同責任感嘅努力，事關佢哋支持埋啲唔遵守規則嘅反叛政權喎。至於俄羅斯更嚴重，直情係基本上違背咗所有有關透明化嘅準則㖭。
佢認為，俄羅斯可能對歐洲構成能源安全威脅，呼籲歐盟制訂強而有力嘅能源政策，迫俄羅斯改變態度。咁中國同印度呢？佢只係好無奈咁話：「我哋可以做嘅嘢唔係太多！」
咁又係，殊仔四圍樹敵，令更多反叛政權可以俾中印政府收買，真係講嚟都嘥氣！