啱啱做咗香港董事學會主席嘅黃紹開噚日請食飯，席間有人問開叔，咁急接任呢個位到底有冇壓力呢？縱橫商界幾十年嘅開叔話，雖然佢都見過唔少風風雨雨，但壓力始終點都係有少少嘅。佢話家吓首要目標，就係務求做到緊守崗位，其他嘢就遲啲再諗。真係答得大體。
開叔仲話，佢唔想俾人覺得董事學會喺一個壓力團體，佢哋個定位係一個向政府及相關監管機構，就不同事宜畀意見嘅學會。對於加強同內地交流，開叔話，佢哋不時都有同內地相關機構或部門，研究係咪可以進一步合作，𠵱家有好多國企董事已成為會員！開叔仲特登提醒華華，佢哋一年一度嘅董事界奧斯卡──傑出董事選舉將喺下月揭曉，叫華華一定要嚟捧場。開叔叫到，華華又點敢唔到呢！