華爾街股市前晚回落，但幅度溫和，個市受壓同大行喺Intel公布業績前降低其評級有關，但係時間就好巧合，可以為連創新高嘅美股帶來沽壓。不過，班好友都唔係善男信女，話油價回番，頂住個市。收市後Intel公布嘅業績比市場預期好，昨晚美股有機借勢炒番上去。
近日啲商品期貨市場消息多咗，但唔係炒主流嘅金屬，多咗談論啲二三線金屬，好似期錫同埋期鋅就無情情炒咗上去，幾日前又有報道話橙汁都炒得好貴，睇怕都係班對沖基金又興風作浪，會唔會遲啲再炒番啲油同金呢？
港股繼續企喺18000之上收市，但係波幅唔算大，成交又縮咗，啲炒家都係一窩蜂炒國企同埋啲窩輪。今年隻國企「風頭躉」國壽（2628）悶咗一排，昨日終於炒上，班fans生猛晒，齊齊出擊，睇嚟跟住呢幾日都會係佢嘅世界。
國壽C輪9014：隻國壽C輪9014昨收1.42元，槓桿11.6倍（有效7.6倍），對沖值0.65，引伸波幅38.9%，炒賣熱度超爆，正股起步炒上，9014嘅爆炸力好大，不過隻輪剩番54日壽命，引伸波幅嘅變化可以好快，必須留意引伸波幅嘅變化。正股呈技術突破，報收16.6元，好自然就要上試高位16.80元，破位就睇上試18元，升上呢兩個位，9014應該會升到去1.56元同埋2.4元，𠵱家買番啲，正股跌穿16.36元止蝕。
國壽C輪2464：國壽另一隻C輪2464已推介過，呢隻輪好好炒，壽命仲有133日，槓桿9.7倍（有效6.6倍），引伸波幅略低，勝在穩定，升跌都幾跟槓桿比率，正股升上16.82同18元，2464應該唔會低過1.84元同2.6元，現價買，止蝕參考同9014一樣。
俊樺