做廿幾年人，問我邊樣嘢最好味？好多喎！夾硬要我揀一瓣，行都係咁話，一定係阿媽親手煮嘅住家菜，始終食足廿幾年，阿媽熟晒我口味，無味精夠健康。今日我認識老闆娘萬小姐，佢因為掛住苗族家鄉菜，所以索性自己開番間「苗寨餐廳」，仲親自落手落腳煮餸待客㖭，我雖然唔係苗族人，但咬住睇落好辣實則唔辣嘅椒包糯米酸辣子，一樣食到嗰份住家菜Feel。
記者︰陳冰
攝影︰譚盈傑
模特兒︰Bianca
老闆娘親自下廚
我估「苗寨餐廳」係香港唯一一家正宗苗族菜菜館，老闆娘萬小姐係苗族人，家鄉貴州自細通山走，𠵱家講說話仍帶重重鄉音嘅佢話︰「我嚟香港打工，成日周圍食嘢，就係食唔到一間正宗家鄉風味菜館。」試完又試無間啱，又唔可以成日返家鄉，佢惟有努力儲錢開舖，餐廳終於喺一個月前開張，主打貴州、雲南、四川特色菜。「喺香港食唔到苗家菜咯，惟有自己整啦，自己整一定好味嘛。」睇餐牌，有雲南米線、土家米線、口水雞等等地方名菜，嘴刁極都一定啱食，不過我就最鍾意食椒包糯米酸辣子，隻隻辣椒紅彤彤，擺入口之前好驚，咬落原來一啲都唔辣，酸酸哋好醒胃。
除米線呢亭大路菜，不得不試一系列出面無得食嘅苗族菜，苗族菜由老闆娘親自下廚炮製，餐廳大廚都唔識整㗎，苗族菜製法複雜又需時醃製，所以要早一日預定。「少數民族菜好多都係就地取材，通常屋企塊地種乜就用乜，例如土豆、辣椒……」驟眼一望，幾乎全部菜式都係自家醃製肉類，再特別調味加辣椒就搞掂，雖然材料簡單，但就好有住家菜Feel，好味到似阿媽煮畀我食嘅住家菜。
椒包糯米酸辣子$58
隻隻辣椒紅彤彤外表勁辣，其實得個樣味道一啲都唔辣，大紅椒去核後釀入糯米粉，加少少酸醋同鹽調味放入雪櫃，雪硬拎出嚟煎一煎搞掂，糯米粉夠飽肚，係苗族人常食菜式。
酸蘿蔔$28
將薑、辣椒、鹽同花椒放入清水浸半個月，水浸到出味就可以用嚟醃製白菜、白蘿蔔或青瓜，苗族家家戶戶都有一樽。
苗寨土豆絲$48
老闆娘：「苗族住山區，土豆當飯食。」土豆即薯仔，苗族人鍾意將土豆切絲加辣椒炒，勁在口感爽到完全唔似薯仔。
蒜泥白肉$28
煮熟肥豬肉切片放涼，苗族人會就咁點鹽水食，老闆娘遷就港人口味：「我用辣椒、炸蒜自製醬汁，點醬就惹味好多嘞。」
辣椒炒臘肉$58
臘肉由老闆娘家鄉帶番嚟，賣晒就想食都無。臘肉醃製後要再用炭火烘烤十日，味濃香口，簡直係中國版巴馬火腿。
剁椒魚頭$88
大魚頭Size大過拳頭，一開為二，加入自製辣椒醬，味道巴辣十足，魚頭新鮮到漏汁，魚肉嫩滑到無得頂。
水煮魚小$78中$98大$108
無想像中咁辣，新鮮鯇魚切片，辣味唔會蓋過魚嘅鮮味。加薯粉（近似瀨粉嘅粉條）入鍋一齊煮，唔怕辣不妨飲埋辣湯。
睇埋裝修
食客有Say
睇埋服飾
老闆娘話：「苗族少女一生人得一套銀器連嫁妝衫，呢套雖然唔係，不過都好靚㗎。」少數民族細細個就要學針黹，服飾顏色搶眼好漂亮，Bianca着住呢套衫好有睇頭，人都靚十倍呀。
搵食攻略
苗寨餐廳（27528803）
地址︰新蒲崗衍慶街22號地下
營業時間︰11:00am-12:00mn
座位︰60位
交通︰黃大仙地鐵站乘20M專線小巴途經衍慶街