內地房產股靜咗一輪後，噚日又見異動。北京華潤置地（1109）升3.7%，中國海外（688）升2.6%，上市唔夠4個月嘅世茂房地產（813）亦唔輸蝕，升2.1%，收報8.63元，有8仙進賬。世房今年7月掛牌，招股價6.25元，上市初期撞啱內地宏調陰影未散，股價打橫行咗個幾月，直至上月中至發力衝到8.91元高位，經過一輪整固後，噚日以大成交升破降軌阻力，短炒有得諗。
喺「香港討論區」入面，網友興奮高呼：「813又開車了！」
魔鬼撒旦非常樂觀：「好勁喎，有機會去到社$10。」
PAULkks等住食糊：「再升多啲，我就落車！」
dick_hk就誓死唔走住：「在未來2-3年，我都唔會落車，對這隻股，只買不賣。」
股價折讓大
12011201比較迷惘，佢話6.70元上咗車，𠵱家掙扎緊應該keep住定係沽咗先。
曼克頓山建議：「keep啦，炒完銀行咪又要炒番地產。」
世房係內地優質房地產項目嘅大型發展商，發展項目遍及上海、北京、哈爾濱、南京、福州及其他快速發展城市。摩根士丹利9月初首次寫報告大力推介，目標價11蚊，睇好理由係該行估計07年度每股資產淨值14.50元，股價較資產淨值折讓甚大。以噚日收市價計，折讓高達40.5%，相對其他中資地產股平均折讓兩成幾為高。
技術走勢上，世房自8.91元高位跌到7.66元後，調整浪底逐步上移，現價企穩10、20同50日線之上，保歷加通道有收窄後撐闊之象，MACD線亦作勢向上，可望出現雙牛訊號，一旦突破8.91元，下一站睇10蚊，短炒止蝕位8蚊。
余文