市區樓嘅單位普遍最大去到千零呎，如果用新盤話嘅實用面積打個七折，隨時得返7、800呎。想住得舒服啲，有人會考慮買兩個單位打通做相連，不過計埋裝修費，分分鐘使近千萬，唔係人人住得起。
網友美麗小龍女就忽發奇想，喺《Unwantsforum》搞咗個「買兩個相連居屋單位可唔可以打通佢？」嘅投票，結果有7個話可以，佔58.33%；5個就話唔可以，佔41.67%。
美麗小龍女就好欣賞自己嘅諗頭：「將一個800幾呎單位同一個600幾呎單位打通佢，咪有成千幾呎囉，兩個單位加埋都係300零萬，幾抵喎。不過我覺得應該唔得……因為居屋唔係私人樓。」
網友留得牙都和議：「如果可以打得通，我諗好多人都唔會買私人樓了，千幾呎300零萬，邊度搵呀？住居屋都係大堂無咁靚，無會所設施之嘛……」
究竟居屋打通呢招行唔行得通呢？網友olo_olo試圖拆解：「記憶中係唔得嘅，一來兩屋之間嘅係主力牆，二來要打通的話係要事先向房署申請嘅。」
asurada2015亦都加把嘴：「是可以的，但不是每一個居屋屋苑都可以做得到。到目前為止，只有黃大仙天馬苑可以做到相連居屋單位，亦毋須向房屋署申請，不過這一類單位要超過4百萬。」
主力牆唔拆得
其實佢哋講嘅有啱有錯，房屋署職員解畫，要睇番每個屋苑嘅圖則先可以決定，即使可以，都一定要同房署申請獲批先可以動工。
咁究竟天馬苑係咪真係有相連單位呢？有代理話，據佢所知，全個屋苑有兩、三個，但並唔係大家想像中嘅相連單位，因為主力牆唔可以拆。所謂「相連」，只係響牆中間開個好似門咁大嘅窿，佢話呢啲單位完全唔渴市，因為根本改唔到間隔，唔算真正相連喎。