康健醫療（397）噚日停牌，待公布一項非常重大收購。市場消息話，公司將公布收購本港規模排名第3位嘅體檢中心，據聞收購作價低至8倍以下PE，話明重大收購，落實之後，成間公司嘅業務規模當堂大增，要成為業內龍頭嘅目標，相信可以好快達到。
康健國際（8138）去年引入「玩具大王」為第2大股東後收購星虹，改名為康健醫療科技並委派其愛女入董事局，早前再通過改名為香港體檢，一來避免同母公司「撞名」，二來確立做體檢業務嘅方向。玩具大王更加以平價租金將大華中心過萬呎地方租出做大型體檢中心，夠晒積極。
康健醫療經歷過2年虧損後，06年度上半年已轉虧為盈，獲利1220萬元，首3季淨賺2020萬元，預計全年盈利接近3000萬元，現市值1.4億元計，PE好低。集團去年被康健國際收購後，雖然橫行咗1年，但係股價從未跌穿過0.1元，睇嚟係幕後想真係做出成績後至向股價埋手，短期未必咁快復牌，但如復牌唔係開得太高，應該跟得過。
中國誠通（217）日前股價急升16%，市傳母公司注資講咗好耐，噚日又再傳過。呢間公司剛於上月公布業績轉虧為盈，賺1727萬元，除咗業績好轉，公司近期的確動作多多，除在年中削減股本及註銷累計虧損之外，又購入浙江省地皮，及配股集資近億元。呢間公司市值唔算大，只係10億元貨仔，但係母公司卻係堂堂國資委直屬公司誠通控股，來頭唔細，喺國內物流及基建做得好大，要注資的話大把嘢可以注入。
歐陽風