晃眼「森美餐廳」已經有38年歷史，想當年40歲創辦人Sammy靠即場炮製的森美汁、全港首創到會服務、堅持每枱麵包即叫即整起家，當年寫食評的白韻琴和唯靈更為一個森美汁與Sammy結為好朋友。從前餐廳門外，午飯時間總泊滿有皇冠車牌的名貴汽車……這些往事，第二代掌門人大家姐Iry、Dickson和Henry由細聽到大，轉述給我知時講到眉飛色舞。
三姐弟本身各在銀行業、電腦工程與酒店飲食業發展，如今合力接管生意，Sammy可以安樂退休，只有時技癢回餐廳露兩手。Iry說：「如果係一般茶餐廳，爸爸絕對可以做落去，無要求吖嘛，不過佢要求好高，佢成日話︰『人哋食嘅嘢，即係我哋食嘅嘢。』即係話起碼自己都要覺得好食，先至可以畀客人食……佢年紀都咁大咯，要人幫手喇。」接手以來，她見回不少熟客︰「有個移咗民嘅熟客話森美汁牛柳咁多年味道無變過，我問佢哋幾耐無嚟，佢哋話20年，哇，真係長情……」
記者︰方綺君
攝影︰譚盈傑
森美汁牛柳$100
用新西蘭和美國入口靚牛柳，開業至今堅持8oz至9oz份量，用黑椒、洋葱、煙肉、蘑菇和紅酒即場做森美汁，靚肉加靚汁，好正。
西伯利亞羊架$120
用只得數個月大的西伯利亞羊，肉質已經勝一籌，新鮮蒜頭放在烤盤底，羊架則放上面烤焗，羊肉焗出來會更加香。
法式炒白菌$55
是道惹味前菜，大大粒蘑菇用已經混入白蘭地的鵝肝醬炒香，鵝肝配蘑菇絕無油膩感覺，吃完齒頰留香。
森美餐廳（25488400）
地址︰西營盤皇后大道西204號地舖（近東邊街）