現年27歲的商台女DJ芝See菇Bi（原名卓韻芝），前日凌晨疑因不堪與男友的感情困擾及追憶去年患癌病逝的母親，在其九龍城寓所寫下遺書後，以酒送安眠藥自殺，幸獲任職金融業的29歲陳姓男友及時將她送院搶救。
多才多藝的芝See菇Bi向來人緣甚廣，故其自殺消息一傳出即轟動娛樂圈，大批圈中人十分愕然，紛紛向她送上祝福和關心。劉德華表示希望她了解人生悲喜，堅強面對；楊千嬅也建議她向友人傾訴心事，抒發情緒免成抑鬱；至於曾經歷喪母悲痛的許志安則勸喻對方放鬆心情。 採訪：林妃
劉德華：人生有喜亦有悲
「聽到阿芝呢個消息幾愕然，希望佢冇事啦，我覺得佢好有才華。人生一定有喜，亦都有悲；有相聚亦都有分離，希望阿芝堅強啲，佢傷害自己，媽咪都會唔開心，要堅強啲呀。」
楊千嬅：傾訴心結免抑鬱
「今日知道呢個消息都嚇咗一跳，同佢雖然冇合作拍戲，但平時喺電台見到有傾偈，我知道佢好錫佢媽咪，佢可能情緒上平息唔到呢種難過，希望佢快啲好番，遲啲我會搵佢傾偈，不過我覺得佢係一個好堅強嘅人，好理性同分析力好強，因為父母對佢好重要先觸動咗佢啫。我自己有唔開心事會講晒出嚟，唔好屈埋，唔開心嘅事一定有，所以要有抒發嘅空間，如果唔係就好易變成抑鬱，咁就會影響人嘅健康，所以我好多時都會搵林夕傾心事，互相幫助好重要，而且林夕曾經患過情緒病，佢𠵱家仲會周圍去學校講座，幫助一啲有需要嘅人㖭。」
Twins：睇得出佢好孝順
「我哋以前同芝See菇Bi合唱過一隻《魚蛋歌》，眼中嘅芝See菇Bi好聰明，對人好真，好誠懇，睇到呢段新聞覺得好愕然，好難令人相信，但睇得出佢好孝順，希望佢可以快啲出院。」
許志安：活在當下應開心
「我唔識佢男朋友，唔知情困傳聞係真定假，唔方便回應，但作為朋友，希望佢可以正面咁面對將來。同芝See菇Bi都熟，我早幾年開演唱會時，佢做特別嘉賓，以小苦妹身份出現，聽到呢個消息好唔開心，我記得98年我媽咪走時，自己成日都問點解，嗰時我就嚟開演唱會，有想過唔開，但掉番轉頭諗，係親人會想你點呢？問咁多點解，永遠冇答案，活在當下應該開心，我都痛苦咗好多個月，所以完全明白佢感受，希望佢放鬆心情，睇將來啦。我對上一次見佢係一個月前，佢冇事，好正常，𠵱家佢睇醫生、休息先，我一定會慰問佢。」
古巨基：知道佢好錫媽咪
「佢感情生活方面我唔係好清楚，唔想猜測，佢身邊有好多朋友支持佢，凡事樂觀啲啦！我知道呢個消息後好愕然，send咗短訊問候佢，希望佢可以快啲康復，之前我請佢幫我拍《花灑》首歌嘅MV，搵佢做導演，我一向好欣賞佢，所以好想試吓同佢合作，一齊合作嘅時候覺得佢係個開心人，好有創意，冇見佢鬱鬱不歡，佢都好專業，而且係一個理性嘅人。我聽聞佢好錫佢媽咪，除咗希望佢快啲健康好番外，希望慢慢可以平復同調整番心情。」
薛凱琪：衷心盼早日康復
「平時喺電台做訪問都會見到，佢畀我印象好開朗，大家見面都會講衣着同音樂，我衷心希望佢早日康復。」
馮德倫：平日見佢好開朗
「平日見佢個人都好開朗，真係諗唔到，呢件事真係幾突然，希望佢冇事啦！當年我同佢為商台部戲各自執導一個古仔時，我已經好欣賞佢嘅才華，想搵佢寫劇本，因為佢寫嘅嘢幾有深度。」
