人紅咗就零舍會大口氣，好似英超阿仙奴個新仔前鋒禾確特咁，繼早前代表英格蘭U21射入兩球砌低德國U21後，上周聯賽同日前嘅歐冠盃都有為阿仙奴上陣，機會多咗於是就口痕噏嘢。禾確特比喻自己係巴西前鋒「大哨」朗拿度，佢話由出道至際遇都同呢位皇馬射手差唔多，仲話第時成就可以媲美朗拿度喎！
同是17歲參與世盃
我求大俠早排上網睇番禾確特代表英格蘭U21場波嘅表現，確實係有啲斤両，總算技術同速度兼備。佢呢期紅，於是好大膽咁形容自己好似走緊朗拿度條路。
禾確特話佢17歲就入選英格蘭大軍參加今夏世盃，咁啱大哨又係17歲代表巴西參戰94世盃，又咁蹺兩個分別都喺1場都冇踢過，所以禾確特覺得自己出道好似大哨。但禾確特話雖然冇份出場，但係就學到好多嘢，對足球事業好有幫助喎，仲講到朗拿度當年冇份踢都影響唔到𠵱家嘅成就，估唔到禾確特又幾識「比喻法」喎。
我求大俠想喺度插一插嘴，奉勸禾確特機會唔係時時有，千祈唔好人紅就亂噏嘢。話晒人哋朗拿度攞過世盃冠軍、神射手同當選過世界足球先生；你定到個目標咁高同朗拿度相比，咪盞令自己壓力仲大？
「我求大俠從冇懷疑過禾確特可以成為大球星，之但係佢現時應該喺阿仙奴繼續爭取表現，爭番個正選位先再講，比喻自己係朗拿度，有少少『自欺欺人』噃。」