上星期六講馬主P對自己有份嘅團體馬有信心，叫左丁山入場，又叫埋中貿林去趁高興，平時打扮好隨便嘅中貿林呢日着整齊西裝，打條色彩豐富嘅領呔，成個人非常醒神，靚仔過咁啱同佢差唔多時間入場嘅明星譚校長。是日乃婦女銀袋日，大量觀眾在早上十點半已在公眾棚排隊等入內攞禮物，攞完走入火車站平台行番出嚟，又試過排隊入內。每年婦女銀袋日點解咁吸引呢？左丁山唔多明白，但既然已成為馬圈盛事，馬會不妨花多啲心機將婦女銀袋日愈搞愈大。乜唔喺啫，當日中午竟然入馬場塞車，極為罕見。事後知道有六萬五千四百幾人入沙田馬場，投注額超過九億三千萬元，正一丁財兩旺，值得馬會高興。
馬主P與一貫人等落到沙圈，練馬師騎師都話好有機會，應該冇Win都有P，出閘留一留，守住三四位，入直路之後不久，拉開打衝鋒，頭馬有望咁話！咦，出閘後隻馬果然依足指示，過咗公眾棚就展開衝刺，唉吔弊，衝衝吓冇晒力，任其他馬趕過，左丁山中貿林搣飛啦，冇眼睇，呢鋪輸得好傷也，馬主P面都黑晒。
莎莎郭做馬主就唔同，佢間大寶號贊助婦女銀袋日，旨在揚威，佢名下隻「終身美麗」成為頂頭大熱門，入到直路以為贏梗，點知畀隻「好爸爸」追過，我哋話如果「終身美麗」輸咗，莎莎郭塊面會黑過「好爸爸」騎師件綵衣，好彩柏寶夠晒落力，力騎之下，「終身美麗」最後反先，令莎莎郭夫婦領得婦女銀袋錦標，不枉一班名媛如利孝和夫人、唐媽媽等捧場。呢日馬場內特多靚女士，打扮花枝招展，戴晒靚帽，有啲英國氣氛。明年莎莎郭如果仍然贊助，不妨要求每一隻化妝品名牌派出兩位至靚嘅化妝小姐到馬場，有齊二三十人到沙圈亮相，擔保謀殺大量菲林，引起哄動，可能會成為一個十月份旅遊節目，吸引到外來遊客。環顧東南亞，只有香港能夠產生如此賽馬盛事，旅遊局應該畀錢津貼馬會搞大「婦女銀袋日」。