「金錢破產並非末路，人格破產才是絕境」，鍾鎮濤（阿B）過了四年破產生涯，昨日終於重生，女友范姜送他一個銀包加10,000元利是，阿B即往買六合彩及剪髮，精精神神迎接財政自由的日子，他更說：「有錢真係好唔慣。」回首過去1,400多天，阿B覺得低處未算低，破產也未算嚴重，結婚反而才是他人生最大一課。 採訪：蔡如玉 攝影：陳俊強
記：記者 B：鍾鎮濤
記：如果中咗六合彩會點用？
B：中橫財梗係做善事先啦，我想幫內地啲細路仔，再嚟係為家人做好安排，等佢哋無後顧之憂，冇財政負擔，安全感好緊要，我希望畀到仔女最好嘅。我自己就想去北海道旅行。
記：破產前後心情有乜唔同？
B：破產時候有低處未算低嘅恐懼感，我最深刻印象係申請破產前兩日，我同女友喺屋企樓下個公園傾咗好耐，決定要破產，當時我唔想負累佢，叫佢走，點知佢唔肯走，仲整多件，哈哈。𠵱家心情係期望「日日是好日」。
「落井下石當然有」
記：係咪好多人變臉？有冇真朋友出現？
B：真係要多謝好多人，我份人唔習慣主動去搵人，破產之後更加唔敢搵朋友，你唔知人哋會點諗嘛，可能以為我𢱑撈或者博乜，整整吓連啲熟朋友我都唔敢搵，點知有幾個朋友真係有好嘢都會諗起我預我一份，冇利益計算，呢啲先叫友誼，仲有我新夾隊band，都係真朋友。
落井下石嘅當然都有，變臉嘅人好多，有一次喺間餐廳撞到幾個導演，佢哋一見我就互望然後冷笑，可能笑我抵死啩，呢啲人唔會合作啦。
記：有報道話你破產過得風光。
B：我一直奉公守法。其實你睇我好，我睇你好啦，話晒係一個藝人，唔通紮炮時候話你知咩？係咪要衰到揸兜先符合要求？苦瓜亁咁點娛樂人？
「唯一得張八達通」
記：有乜係破產時唔做得㗎？
B：唔去得旅行，唔搭得的士，但我係藝人，出入工作，公司會提供畀我。之前我都冇銀行戶口冇信用卡，唯一得張八達通，我會去開番個戶口，暫時唔知出唔出信用卡，都習慣咗冇卡一身輕，唔使交卡數，只係有時酒店checkin唔方便。
記：因破產而做嘅呢？
B：最正係奉旨搭公共交通工具，搭地鐵搭van仔，我呢兩年先知有冷氣van。冇乜人用奇怪眼光望我喎，本來無一物，你個心覺得有嘢先會有嘢，我都會去茶餐廳同大牌檔，會喺銅鑼灣行路去灣仔，我識調節自己，喺幕前要專業，喺幕後要識點享受生活，唔係物質，係心理。
記：章小蕙打官司贏裕泰興唔使俾人追數，你有冇後悔申請破產？
B：當時係nochoice，可能未必要，但我真係唔知發生過乜事，只知自己簽過名就爭人錢，人哋狂追我數，到最後只有行呢條路，如果話申辯可以冇事，我連件事點發生都唔清楚，又點識去申辯呢？不過都過咗咯，講多無謂，呢一課對我嚟講未算最重，結婚先係我人生最大嘅一課，因為後遺症比破產大好多。
記：仲會結婚嗎？范姜跟你咁耐。
B：有個女已經係兩個人之間最大嘅承諾，結婚只係形式，至少要有經濟基礎，買到粒大大粒嘅鑽石求婚先啦，我唔係怕咗，都唔排除日後會結，到時個女可以做花女。有乜同女友講？閂埋門講啦。