廉署執行處前首長郭文緯自從離開咗廉署後，經常周遊列國，擔任其他國家同地區嘅反貪顧問，又喺港大持續進修學院幫手搞反貪課程，實行將廉署30幾年嚟嘅反貪策略發揚光大。呢個禮拜佢又飛喇，就係去北京幫08年奧運搞反貪課程，等啲參與奧運籌備工作嘅人員有啲防貪意識。下個禮拜佢就會出席由北京牽頭搞嘅國際反貪會議，做大會顧問，然後先返香港。
八方同人稱「郭大俠」嘅郭文緯傾開，佢仲爆咗單料過八方，話一年多前上海市政府曾經搵過港大持續進修學院，話有興趣搞個畀啲公務員讀嘅防貪課程，但唔知點解搞搞吓就無疾而終。郭生講笑咁話，𠵱家睇番轉頭，當時可能係因為陳良宇覺得唔使搞啦。