漁農界不嬲都係政府友好，今屆選委會選舉，漁農界嗰40席如無意外會落喺親政府陣營手上，事關喺百幾個漁農界團體中，據聞親民主派嘅得嗰三幾個。咁講法，漁農界呢40票，煲呔都袋袋平安。
不過，八方就勸煲呔咪開心住，事關唔少漁農界選委都覺得，以前佢哋太過乖，票就畀晒政府，但政府似乎唔係好騷佢哋喎，只係象徵式幫吓手就算；選委會適逢換屆，聽聞有業界就想跳跳草裙舞，話嚇吓煲呔都好。
好似原選委陳國華就覺得，業界真係要惡啲先得，如果林謝謝，煲呔點會睇上眼？佢仲話自己試過有次同周一嶽開會，真係拍枱發咗火，啲官先至肯跟進，所以業界係時候扭吓計。
佢仲建議業界立法會代表黃容根唔好再「咁仁慈」，可惜根哥似乎都係唔buy呢種激進手法，仲話都係應該同政府「慢慢傾」，作風非常溫和。但係業界仲有好多嘢要同政府fight，根哥都係學吓工聯三子，唔使畀面；手執40票，使乜驚呀？