影音試團：CanonG系復古版　7招反擊單鏡DC

今日呢位靚女Rudy，一向都鍾意拎住部卡片DC周圍影，不過影得多自然有要求，卡片機再滿足唔到佢，自然想搵部功能勁啲嘅DC。雖然近排單鏡DC平咗咁多，不過佢話要帶咁多「架生」出街，真係見到都怕怕，所以當拎到Canon最新推出嘅PowerShotG7上手，Rudy立即試勻其7大功能，佢仲話最有印象係人臉對焦，又快又準！
記者：許福合
攝影：陳盛臣

有齊熱門功能

當拎住新機G7喺手，貪靚嘅Rudy好似揀衫一樣先睇佢外形，然後就話G7用上黑色機身，感覺好Pro，機背又咁多掣，唔知佢識唔識用咁話！同時佢大讚機身夠堅固，事關G7用上金屬機身，當然特別實淨。

1.9張臉對焦啱大合照

G7最與時並進嘅，就係加入人臉對焦，實試後發覺原來好方便，畫面內有多塊臉，G7都可以搵晒出嚟兼對埋焦，最勁係可以揀用邊塊面來Focus，而且最多可同時對9個臉孔。

2.16:9闊景照拍

G7亦新增16:9闊景拍攝，影風景尤其有氣勢，就算SnapShot都另有一番風味，駁番家中闊屏LCD度睇一流。

3.6X光學變焦

G7雖然無支大炮鏡頭，不過都具備有6倍光學變焦（35至210mm），比單鏡DC跟機標準鏡靈活有彈性，毋須經常換Wide鏡或Tele鏡。

4.拍片解像度勁過DVD

除咗影相，亦都經常用DC來拍吓片，G7可以1,024×768（XGA）拍攝動畫影片，比DVD更高，雖然只係每秒15格，不過有咁高解像都叫補番數，而最長可以拍到60分鐘。

5.創新ISO獨立轉盤

G7最特別係有獨立ISO轉盤，方便因應環境即時轉換感光值，遇着忽明忽暗嘅戶外環境，如猛烈陽光或被雲遮蓋，都可即時轉換ISO遷就，毋須改光圈同快門。

6.免電腦即時印相

G7亦支援PictBridge免電腦印相規格，可直駁Printer印相，以機內屏幕揀相及操作，相當之簡單易用，駁好線㩒個掣就搞掂。

7.千萬像素印大海報一流

G7亦都突破千萬像素，比同樣以平取勝嘅單鏡DC350D更高，所以莫講話印A4大相，即使要印A3大海報都綽綽有餘，而且因為解像度高，即使相片較豐富細緻嘅部份，只要配番個靚Printer，印出嚟仍可以睇得一清二楚。

9張人臉齊中焦

數碼相機谷完一輪防震功能，今期轉玩人臉對焦。講到G7嘅人臉對焦系統，絕對係用料實淨，基本上只要塊臉向正鏡頭，都可以俾G7搵到，同一時間，最多可以喺畫面見到3張面孔對焦點，並且持續追焦，大大加快對焦時間。當按下快門時，若果發現唔中「心上人」，仲可另外挑選，最多可以鎖定及對焦9張人臉！當要拍一大班人大合照時，更可以利用自由人臉模式，㩒住個Set就可以喺相片內人臉逐個揀，保證唔會「Sharp」錯人喇！
另外G7唔單只對人臉咁簡單，仲會因應環境及人臉作曝光調整，憑住ISO3200高感光值，就算遇到大背光或夜景拍攝，都可拍出靚靚人像相。

■千萬像素相片最好用SDHC卡，儲存速度比較快。

■比較少見嘅減光鏡功能，可減低約2級光度，以遷就拍攝。

■ISO最高提供3200，影夜景就變得輕鬆好多。

為Classic取消扭芒

今次新機外形，有啲似古董相機，機背設有大量掣，連一啲較少見嘅功能都由Menu抽咗出來。最明顯係ISO轉盤，可以由80扭到去1600，影相時要修改都幾方便；若果連1600都未夠，仲可以打開Menu，搵番ISO3200，配合埋IS防震系統，咁就影煙花都唔使用腳架，方便好多。
多掣雖然感覺Pro啲，不過對未用過G系用家，操作上有啲難上手，尤其係要用埋Shortcut功能，真係有唔知㩒邊個掣嘅感覺。而作為G系列新機，G7無論喺操作速度同反應上都相當令人滿意，爽快有如用緊單鏡機一樣！另外，曾幾何時，扭芒可以話係G系招牌，不過呢個特色唔再喺G7上出現，只係配上一個標準大小嘅2.5"芒，雖然普通咗啲，不過可視角度達170度，加埋反應快速，就算高低角度都唔怕睇唔清。