編輯見美少女廚神賈曉晨（JJ）索，屈我叫佢推介心水食肆，見佢身材瘦削唔多食嘢咁款，初頭都驚無貨交，問落至知佢原來係隻超級食肉獸，仲同我講：「無肉落肚等於無食過飯呀。」師妹陳泳文（Mio）搭嗲：「佢仲好鍾意食鴨肉，口味刁鑽㗎，話鴨腸最好味喎。」又點刁鑽呀？姑且又睇吓JJ有乜噏……
記者：蘇振鵬
攝影：陳偉強
好味7鴨Delicious
a.深藏不露
平時淡茂茂嘅海參用上湯浸過，誇張啲講入味到用水喉水沖都仲有味，除咗海參，餡料仲有先薑爆後用蠔汁燜嘅冬笋同冬菇。所有餡料釀入鴨身後再炸一炸，表皮上色後仲要蒸個半鐘，熟透出油咁先香噴噴。
b.羅漢大鴨
製法同深藏不露一樣，但餡料就用羅漢齋，分別有雲耳、竹笙、生筋、草菇、蘑菇，用上湯煮過再釀入鴨身。
c.掌上明珠
急凍鴨掌要先沖水備用，以防關節爆開唔靚。圍邊嘅草菇、蘑菇、時菜用上湯煮過，夠入味，最後埋個蠔汁芡，色香味俱全。
d.檸檬鹹菜燉鴨湯
隊一啖，鹹得嚟有少少酸，皆因加咗平時蒸烏頭魚用嘅唐檸檬，用上湯浸過嘅鹹菜燉鴨件，係店主自創菜式，出面好難飲到。
e.梅子蒸鴨
梅子醬用麵豉、梅子、蒜茸炮製，酸甜惹味，墊底有用沙茶醬、上湯浸過嘅芋頭，芋頭唔會一夾就散，每件鴨肉都非常彈牙。
f.味菜涼瓜鴨腸
涼瓜用上湯淥過，去咁啲苦味，味菜用上湯浸一浸沖淡鹹味，涼瓜唔算太苦，味菜亦易入口好多。蜆水浸鴨腸食落爽口，加上湯、麻油、胡椒粉一鑊炒，香口到爆。
g.醬爆鴨舌
滷水鴨舌食到無癮，醬爆鴨舌果然有新鮮感。簡簡單單，加辣椒醬、蠔油、亁蒜嚟炒，保留到鴨舌甘香，辣辣哋送酒一流。
我認我係食肉獸
鏡頭前JJ煮得一手好餸，鏡頭後嘅佢係個食肉獸：「勁鍾意食肉，油雞、牛扒……唔，不過最鍾意都係食鴨，我認我係食肉獸，每餐飯要有肉先似樣，哈哈。」乜肉都食得，淨係豬肉無佢份，事關佢係回族人：「細細個媽咪就教我豬唔亁淨，唔畀食。每次食飯，我都會問清楚或者聞吓啲餸有無豬肉喺入面，連火腿、用豬油炒過嘅嘢都唔食得。有次食咖喱，因為咖喱味太濃，聞唔出有豬肉喺裏面，唔小心食咗，嘩！我即刻想嘔，仲用可樂當消毒藥水咁飲足一日呀。」師妹Mio呢？原來都係忍唔到口一族：「我都成日食嘢㗎，係好怕食魚，但就勁鍾意食甜品囉，寧願唔食主菜都要食甜品。」
一手扯骨扯出鴨殼
叫JJ推介心水食肆，佢二話不說揀專食懷舊粵菜同客家菜嘅「和暢之風」，JJ最鍾意呢度啲釀鴨：「釀鴨好多功夫㗎，出面唔多地方有得食，呢度好足料，一隻鴨要幾個人先食得晒。」總廚吳永皓話：「釀鴨最考功夫係拆骨，一般師傅多數切開中間，起完骨再縫番埋鴨身，我就喺鴨尾開個窿，用刀沿邊切，齋用手出力一扯就拆到骨，10分鐘唔使搞掂。」咁好手力？原來吳師傅不但有廿幾年主理私房菜經驗，本身亦係個武術師傅，手力當然有番咁上下。「要煮得一手好餸，首先要當烹飪係一種藝術、一種宗教先得……」嗚，唔使又藝術又宗教咁講到咁玄嘅，我認為只要有Heart，食物就一定好味，係咪咁講先？
食客有Say
搵食攻略
和暢之風（26384546）
地址：大埔運頭街20-26號廣安大廈地舖
營業時間：11:30am-10:30pm
交通：大埔墟火車站行5分鐘
座位：80個
最好賣：客家鹹雞、客家涼瓜、魚唇、深藏不露
備註：不設加一、茶芥，只收現金，釀鴨1日前預訂