曾志偉早兩個月前喺香港小姐競選當晚同狄娜唇槍舌劍，重提對方拍過艷情片《七擒七縱七色狼》，激嬲狄娜，結果事後要道歉。點知王晶最近籌拍新戲，就食住上將戲名改做《七擒七縱七色狼》，仲搵埋志偉做其中一隻色狼，認真搞笑。
拍咀戲益自己
志偉前晚喺黃埔出席香港藝人高爾夫協會嘅周年晚宴，自爆之前約咗王晶傾呢部新戲，佢話：「我要做其中一隻色狼，係隻披住羊皮嘅狼，或者叫刀狼。」成班記者即刻齊聲叫志偉咪玩，點知佢態度好堅定咁話係認真嘅，仲話已經睇咗劇本，橋段類似王晶舊作《精裝追女仔》咁喎。
至於邊個會做女主角？志偉話：「王晶話搵到兩條女，好正㗎，一個係翻版陳慧琳，一個係翻版利智，我都好期待，好想見到呢條女，王晶話會左擁右抱帶佢哋出嚟亮相喎。」至於其他色狼人選，志偉話仍然未定，預計套戲會喺下月開拍。
話口未完，王晶前晚真係帶咗嗰兩個女仔出席電影《臥虎》首映，一位叫孟堯，一位叫劉洋，佢哋着晒低胸裝出現，仲被安排做人肉布景板，不停同嘉賓合照。陳小春同佢哋影相嗰陣因為唔夠高，要趷高腳尖，笑死隔籬。
聽講王晶真係想捧紅呢兩個女仔，仲安排自己喺新戲裏面同佢哋拍咀戲喎，咁算唔算假公濟私呢？
