鄉議局喺6月底通過由李景勳建築師有限公司，承接鄉議局喺沙田建新局嘅工程，換言之，曾經都入過標而被指有利益衝突嘅煲呔表哥香灼璣完全無行，相信呢件風波可以平息喇。
建新局當然要籌錢，除咗一班大佬四出去海外募捐外，鄉議局都諗住打新界居民荷包主意，決定透過鄉事委員會同村代表，發動每位新界居民認捐200蚊。鄉下人一向被認定乜都「男人大晒」，原來鄉議局原本都諗住只打男丁主意㗎咋，點知有女委員聽後即時抗議，話為局捐錢應該不分男女，最終先決定一視同仁；可惜吖，呢個認捐行動完全無約束力，聽完唔捐都吹佢哋唔脹，鄉議局班大佬都唔好咁老定呀。