未夠19歲離家出走，一走差唔多30年，咁多年未跟爸爸聯絡過，7年前得悉爸爸重病，先再踏足香港……佢係叢鐵飛，爸爸去世後繼承有40年歷史嘅「仙宮樓」，講起離家出走嘅往事，佢淨係講咗句：「錯晒！」不願多提，有感慨但不後悔。「我一定要保住仙宮樓，要生存落去。呢度係爸爸同朋友、同鄉聚腳嘅地方，好有意義。」話就話唔後悔，不過睇得出佢雙眼滲出點點憂傷。
「爸爸一向將酒樓交畀人管理，我接手後無將呢度改頭換面，只係維修一下地方，同埋上菜時要做得仔細啲，指定要加公筷、跟刀叉。我要保持呢度嘅懷舊味道，有好多以前嚟呢度拍拖嘅情侶，𠵱家會帶埋仔女嚟食嘢，唔只中國人，殖民時代外國人嘅仔仔女女都會嚟幫襯，佢哋就係鍾意呢度嘅舊式裝修。」上月上映嘅港產片《狗咬狗》嚟過「仙宮樓」取景，自此佢不知幾留意報紙上有關呢套電影嘅消息，「話晒『仙宮樓』個名都喺戲中出現過吖，近年我同旅行社合作，旺季日日接日本遊客生意。」佢肯繼承爸爸生意，咁將來呢？「唉！仲未搵到繼承人，我啲仔女喺外國，連中文都唔識講，佢哋唔會繼承『仙宮樓』㗎喇，暫時都未有其他對象，留意緊㗎喇，希望盡快搵到啦。」
記者：黃若茵
攝影：林栢鈞
松鼠魚$180
叢先生話：「魚肉炸到一條條豎起晒咁，好似松鼠，所以叫松鼠魚。以前用黃魚𠵱家改用桂魚，貪佢啖啖肉，酸酸甜甜送飯一流。」
鹽爆管廷$70
叢先生話：「管廷即係豬喉嚨，成吋長，做法好複雜㗎，要經過洗、蒸、反、刮、浸、切、拖、拌8個程序，咬落好爽口。」
仙宮樓京川飯店（23665784）
地址：尖沙嘴金馬倫道16號2樓