祖雲達斯今季降咗落意乙比賽，搞到場場波都好似大人同細路踢波，幾乎贏梗咁滯。好似前日祖記又作客擊敗泰列維素1:0，聯賽5連勝後以-1分排喺尾2（開季扣17分），多榜尾阿雷素1分（違規被扣6分），唔使再做包尾大幡。不過，祖記場場亞洲盤都要讓對手球半或以上，帶挈唔到球迷贏錢嗰度衰呢。
祖記季前雖然走咗唔少主力，但仲有中場尼維特、前鋒廸比亞路同查斯古特等咁多勁人壓陣，難怪佢哋仍然大超班，查斯古特仲暫時以5個聯賽入球成為意乙射手榜榜首㖭。
話就話𠵱家祖記仲係負分，同榜首嘅熱拿亞有16分距離，但係外國大莊依然睇好佢哋可以後來居上攞走聯賽冠軍。
冠軍賠率熱到1.4倍
好似博彩公司「betfair」，就開咗意乙聯賽奪標賠率，祖雲達斯仲以1.4倍成為冠軍大熱，第2位就係萊切嘅12倍；之但係站喺投注角度，1.4倍抵唔抵買真係見仁見智。記得開季前，祖記嘅奪標賠率有成2.25倍，當時入貨都姑且叫抵買，𠵱家得番4成回報，而且意乙前3位都可以升班，大家度一度個值博率啦。
「求大俠喺度奉勸球迷，祖記亞洲盤成日讓對手球半以上，隨時贏波輸盤；至於佢哋奪標賠率得1.4倍，不如睇啱一場半場車仔或巴塞嘅賽事，重鎚佢哋贏波仲化算。」