曾特首嘅施政報告公布後，曾特首民望下滑，好多人打電話到電台去鬧，頗令左丁山驚奇。有人批評曾特首冇前瞻，冇遠景，有務實，不進取，實在太自私。左丁山對此不敢苟同。
首先，左丁山贊成積極不干預，主張公共開支不超過GDP兩成，曾特首在施政報告中，起碼唔肯為最低工資立法，推出有限制之幼稚園學券制，都值得我哋支持吖。坦白講，如果要「大市場、小政府」，政府千祈唔好在施政報告內大發宏願，表示大有為，列舉種種政策引導各行各業向前邁進，舉例而言之，以往講八萬五、科技港、乜乜大計，咪搞到大家雞毛鴨血！左丁山情願政府務實踏實，能做嘅就做，唔做嘅就唔好開期票。基於呢個準則，左丁山認為今年之施政報告值六十分。
之但係咁，施政報告亦凸顯咗曾特首對市場信心不足，唔敢擇善固執，向壓力團體退讓半步，向政黨低頭，於是容易變成兩面不討好，影響民望。曾特首之主要政治妥協就係為兩個行業（保安與清潔）推行「工資保障運動」，希望靠輿論壓力與政府扭手臂（armtwisting）嚟逼使呢兩個行業自動向工人提供一個所謂最低工資，葉澍堃局長更出言恐嚇，如果僱主不執行，兩年內就會立法設立最低工資，咁嘅言論，對曾特首聲望只有壞處，冇好處。葉局長之言，即係承認政府唔敢明目張膽為最低工資立法（因商界與經濟學家從實際及理論層面反對，政府無可反駁），但想暗渡陳倉，鬼鬼祟祟咁樣逼中小企就範。
學券制方面，本已是Ａ貨，原諒特首有壓力，算收貨啦，點知李國章局長幫佢倒米，出言指責「牟利幼稚園」八成不及格，乜嘢叫做及格先？私立幼稚園學費收得貴，但學生收到爆棚嘅話，即係市場接受晒，家長認為及格啦，使乜你政府話唔及格？曾特首拚命搶分，佢啲局長就幫佢失分，點算？