嶺南大學噚日頒授榮譽院士畀蔣麗莉、許冠文（Michael）、高靜芝同伍達倫，表揚佢哋喺社會公益、教育同事業方面都有超卓成就同貢獻，由嶺大校董會副主席陳智思議員主持頒授儀式。Michael演戲演到做院士，佢阿媽、太太、細佬許冠武同個仔都嚟晒觀禮，蔣麗莉嘅爸爸蔣震、仔女同家姐蔣麗萍都有到。
Michael話佢一見到嶺南校長陳坤耀，已經忍唔住問點解要頒榮譽院士畀佢，陳校長就話要歌頌Michael對社會有貢獻，過去幾十年為香港帶嚟好多歡樂笑聲。Michael同記者話：「發夢都估唔到自己個夢可以實現，事關讀大學時，已經好恨做院士，原因只係覺得件院士袍好靚，諗唔到做戲引人笑吓，個夢就可以達到，所以話一個人所做嘅嘢永遠都唔知結果係點，今次個榮譽對我好有特別意義，將來有機會我會重返校園教書，教電影社會學，我覺得時下年輕人唔夠創意，所以想喺呢方便發展吓。」
至於蔣麗莉就話以前一次南極之旅改變咗佢嘅睇法，佢話南極嘅風景，令佢領略到自己係地球嘅一分子，應該要對地球有份責任心，於是響99年創辦一間環保公司，同年就做咗傑青，兩年後又成為「香港科技界傑青」，所以八方話有時做嘢唔可以咁計較，啲好事反而會係咁嚟㗎。