噚日四大商會喺會展搞午餐會，請煲呔講解施政報告。煲呔最近成日講錯嘢，前日先說漏嘴，好似預告自己連任咁話下年份施政報告會講長啲；噚日唔知係咪又俾「鬼拍後尾枕」（英文叫做FreudianSlip，即係心理學家佛洛依德嘅理論），演講時將「MarketLeads,GovernmentFacilitates」（市場主導、政府促進）調轉咗，變咗做GovernmentLeads（政府主導），講埋呢句真心話。啲商界即場爆笑，搞到煲呔𤓓爆！
好彩啲商界都算客氣，冇乜刁鑽問題問煲呔，冇前日啲學生仔咁難搞。有個商界人士就話煲呔，冇喺施政報告度講種族歧視立法；煲呔就話，今年肯定有法例提交立法會，施政報告唔提，唔一定代表唔重要，佢會建議佢嘅繼任者，下次施政報告記住講長啲、講多啲。煲呔前日都自爆咗啦，預下份施政報告係佢寫，連主持嘅蔣麗莉都插句嘴話「咁即係話畀自己聽啫！」
台下要企喺度歡迎特首
四大商會嘅午餐會演講，已經係每年施政報告後嘅例牌菜。但今年嘅安排同以前有啲唔同，有商界同八方投訴話，煲呔入場時，唔知點解大會要大家起立迎賓咁巴閉？煲呔仲好似變咗主持人咁，坐喺張梳化度答問題，好似反客為主，喺台上指點江山、不可一世咁，以前都唔會係咁喎，至少唔使佢哋企喺度歡迎特首，答問題時特首都要企喺講台前啦！呢啲安排唔知係總商會嘅安排，定係特首辦要求。
煲呔噚日答問題時，態度都麻麻哋。有個加拿大佬問煲呔，向外國公司借錢嘅利息可唔可以扣稅，可唔可以改吓法例？但煲呔就寸佢話，你喺加拿大都冇呢啲法例啦，如果搞埋呢啲稅務寬減，咁就真係要快啲開徵銷售稅啦！雖然條問題幾無厘頭，但人哋商界請你嚟，咁講嘢又真係幾唔好聽喎。
到咗噚晚，煲呔就去銅鑼灣出席地區諮詢會，唔少參加完嘅區議員都呻冇料到，就連民建聯都唔幫煲呔，好似民建聯嘅區議員潘進源就寸煲呔係政客，答問題耍大極，講埋啲嘢答咗等於冇答。