改裝車：MKB改平治CL　增容積加馬力

改裝車：MKB改平治CL　增容積加馬力

以改裝Mercedes-Benz而聞名嘅MKB，日前終於正式登陸香港，負責將之引入嘅HilltopMotorsLtd.，更於上星期五喺位於寶馬山嘅大本營搞咗個Party，更同場展出咗一部以增大引擎容積，而令馬力輸出急升至403匹嘅MKBCL55RS跑車，令人看得目瞪口呆。
記者、攝影：鄭達基
查詢：HilltopMotorsLtd.（29790002）

着重機械改裝

來自德國嘅MKB，一直以嚟都係以改裝平治車款而聞名，而佢哋則着重改裝機械配搭，以達致增強性能表現嘅好處。就好似大家眼前呢部MKBCL55RS跑車咁，佢哋就將引擎容積由原來5.0公升增至5.5公升，同時又改用高性能嘅Camshafts、賽車用風隔同埋盤頭經過特別處理嘅工序等等，從而令馬力輸出增至403匹。另外，據MKB主席PanagiotisAvramidis先生所講，佢哋正落力研究點樣改裝唔同型號嘅平治車款引擎，甚至波箱都會係改裝之列，以滿足追求速度感嘅Fans需要。

■頭泵把有整流器外，連霧燈都變成4圓燈設計。

■車廂陳設，跟原來嘅CL跑車相同。

■尾泵把加有擾流裝置外，仲有4出式尾喉配搭。

■胎軨換上MKB嘅19吋AlphaIII款式，好襯部車嘅Style！

■MKB高層難得來港，難怪HilltopMotors嘅Simon（中）會笑逐顏開。

跑車包圍一樣咁掂

或者你會覺得，MKB只係一間專注平治車系機械改裝嘅公司，查實佢哋都有推出唔同嘅車身改裝部件，畀不同型號嘅平治車款使用，就以今次展出嘅MKBCL55RS為例，車上便裝有MKB自家嘅BodyKit，例如頭尾泵把連整流器、車身兩側裙腳及4出式排氣喉等等，就連胎軨都有不同款式任你揀，啱晒鍾意部車有特別造型設計嘅車迷。