上個月先出完全語音版《TOP》，廠方咁快又將《TOD》（命運傳說）Remake埋，事實上Game界好多時確係新不如舊，好似筆者試玩呢款尚未賣街嘅PS2《TOD》時，就發覺遊戲基本上只係沿用舊有骨幹故事，城鎮、迷宮等全部重新3D化，連最好玩嘅戰鬥系統，都將五花八門招式大幅提升，更加入空中連招追打，幾十Hit咁喪劈真係爽到極點！
文：陳福榮
2D畫面變3D
《TOD》雖並非系列首作，但作為登陸PS頭炮，當年的確贏唔少掌聲，尤其係唔少人都俾佢首主題曲《如夢似幻》吸引，個個都識哼番兩句。呢次移植落PS2絕對係交足功課，事關有晒近幾年開發經驗，畫面水準同系統都有番咁上下，呢樽新瓶舊酒最花工夫之處，莫過於雕花嘅戰鬥場面同埋3D城鎮，令本身非常感動嘅故事有機重見天日。
CG動畫值回票價
基於畫面全面3D化，遊戲同以往最唔同嘅地方就係響迷宮加咗唔少解謎部份，從而使玩法變得更有深度，一般人都能夠喺冒險過程中得到互動，唔再單靠文字嚟形容咁寡；起碼開個機關都會有多啲嘢睇啦。另外佢嘅角色聊天系統，亦由以前僅得一個人頭變成睇晒半身，仲會因應情況不斷更換插圖，令人好似睇緊動畫咁款。除此以外，向來《Tales》系列都係靠條片頭動畫搶客，呢次佢更落重本，不但保留番原本好正嘅Opening，仲搵嚟兩大巨匠ProductonI.G.同白組，分別負責過場動畫和CG片段，單係睇片都已經值回票價。
調校得宜可駁招致死
PS版嘅戰鬥系統源自超任隻《TOP》，今次喺PS2上重製，將原版嘅單線式戰鬥系統E-LMBS進一步升級為AR-LMBS，除近乎無限伸延嘅水平戰線之外，更引入類似格鬥遊戲嘅空中Combo技，唔單只大大增加對空用嘅奧義實用性，而且更可引發一連串招式追打，閒閒哋十幾二十Hit咁追打落去，若同伴指令調校得宜，成功互相駁招下，大佬級敵人都隨時一命嗚呼！
限量DVD明冧聲優迷
雖然最近幾集《Tales》都有贈送特典光碟，搞到冇乜特色，但有邊個Fans會嫌多㗎？今次《TOD》重製版嘅DVD，都係以專誠收錄聲優對談作為最大賣點，仲撈埋《TOS》同《TOA》嘅人物大玩Crossover，真係過癮到極點。另外隻碟亦有共12首人氣BGM，由負責今集音樂嘅櫻庭統重新炮製，鍾意聽佢啲音樂嘅人真係有福囉，話晒有成40幾分鐘咁多，抵過買OST啦。
機迷唔玩唔安樂
雖然遊戲未推出，不過今次喺SCEH個會議室度，可以率先試玩呢隻《TOD》金碟測試版，梗要搵多兩個機迷畀意見。
玩過舊版嘅阿活
「好多年前已煲爆PS版，𠵱家拎起手掣感覺一啲都唔陌生，戰鬥感覺都係咁實在，絕招畫面正到爆，真係唔玩唔安樂！」
至愛3D嘅美女Ruby
「我最鍾情3D遊戲，平面嗰啲咪搞，呢隻《TOD》做得好靚，色彩又夠豐富，尤其係幾位男主角都好靚仔！」
PROFILE
遊戲類型：RPG
對應機種：PS2
遊玩人數：1人
開發廠商：NamcoBandaiInc.
推出日期：11月22日
行貨售價：$420