港股連升5日，收市終衝破18000大關，收18010，升21點。大市在18000關口會出現激烈爭持，料橫行整固短時間後，再破位而上。
浩倫農業（1073）連日急升，噚日最高搶上0.91元，收0.89元，再升7仙，交投繼續熱熾，有成3000萬股。兩個禮拜前推介，當時股價0.57元，噚日高價計已上升60%。再講對上一次係今年2月中，當時股價0.445元，1個月內急升上0.71元，升幅亦係60%！
市場憧憬浩倫會宣布佳績（10月24日），相信公司亦唔會令捧場客失望，但股價急升後，相信要整固一下，在0.80元至0.90元間上落，有貨在手者，可先獲利一半，其他繼續以上移止賺位持有。
剛破位追得過
市場上好似浩倫之類嘅寶藏仍有唔少，南海控股（680）係其中值得特別要注意嘅一隻，佢已連升兩日，但𠵱家先係啱啱破位，更有大成交配合，追得過。
南海在內地發展地產，「晒士」屬於中型，主要係在深圳同廣州做兩個大項目，樓面面積加埋超過200萬平方米，明年開始進入收成期，項目於早年買入，發展完成後，盈利會好可觀。
位於深圳蛇口嘅半島城邦，第1期在今年2月發售，好墟冚，1012個單位5日內售罄，平均每平方米售價1.1萬元人民幣，套現16億元人民幣。第2期已密鑼緊鼓日內推出，聽聞樓價會有5%至10%嘅升幅，全部售罄後估計可套現20億元。
廣州花都項目「晒士」仲大，總建築面積108萬平方米，第1期已開工，明年下半年開售，提供售樓收益，以後每年年年賺8億至10億元，PE只係單位數，股價有爆炸力上升。南海收5.7仙，升破前高位同長期降軌，日線同周線圖MACD都現入貨訊號，短期目標7.7仙，中線可見10仙。
郭兆誠