唔經唔覺，歐冠分組賽已經踢咗兩輪賽事，今日揀咗波圖主場對漢堡做重心。
波圖喺2004年在摩連奴帶領下捧盃，可惜近兩年喺歐冠嘅表現一般，上屆早在分組賽已行人止步。雖然𠵱家兩戰得1分排第3，仲有今場對手漢堡墊底；加上波圖喺葡超已站穩1哥地位，現時目標大可放在歐冠之上，狀態同鬥志絕對唔成問題。主場贏波亦相當正路，就揀主客和：主勝。
漢堡12場不勝點頂
反之漢堡自今年8月友賽小勝羅馬後，所有賽事加埋，已經連續12場未贏過。近況咁差，主要係多名主力受傷、加上整體球員狀態低沉所致。以漢堡現時嘅兵力，可唔可以同時應付聯賽同歐冠，的確令人懷疑。
周中除歐冠之外，英冠亦加開快車。其中我睇中卡廸夫城主場對修咸頓一仗。卡廸夫城季初表現令人刮目相看，近期已經連贏4場；主場就更加厲害，5戰取得4勝1和，依然保持不敗，勝出率高達80%，佢哋仲係現時英冠攻守力最強嘅球隊。
修咸頓季初表現唔錯，但近況有滑落迹象，對住實力一般嘅昆士柏流浪同李斯特城都要輸波，更何況今場作客1哥卡廸夫城？睇嚟輸波都係例行公事。
阿鵬
有線球彩台主持
電郵：[email protected]