正當曾特首積極鼓勵市民生育之際，「風之后」李麗珊突然嚟一句「養大一個細路哥原來要400萬」，當堂嚇窒唔少有意「造人」嘅夫婦。有網友就喺《香港討論區》上提出，香港地「生仔容易養仔難」，加上樓價咁貴，真係唔識計數，並敦請曾蔭權、李麗珊，同地產商坐埋一齊，拆掂條數畀小市民聽聽。
滿腦子疑問嘅prawrice說到︰「曾蔭權叫我哋班後生最好生三個細路，李麗珊話生一個細路要400萬，三個即係1200萬。在曾蔭權繼續用高地價政策下，一間三房新樓閒閒哋都要300至400萬，如需分期按揭，連埋利息、差餉、管理費、燈油火蠟，一生中將要投放至少700萬喺樓房度。呢條數加起來已經係1900萬!!!
平均月入4萬都唔掂
當我呢一生做40年工作（22歲到62歲），我必須每個月人工要有︰1900萬元÷40年÷12個月=39583元，仲未計40年的交通費、早午晚三餐、供養老竇老母、進修、衫褲鞋襪、人情或帛金等，我究竟要搵幾多錢1個月，先至滿足到以上班老細條數？乜香港人工條中位數唔係得1萬蚊左右咩？」
prawrice嘅問題，bunnypanda有咁嘅回應︰「曾蔭權只係鼓勵『李澤駛』、『許晉哼』等人生多啲，從未暗示港人多生。『李澤駛』要4000萬養個仔，李麗珊要400萬養個女，一般市民用40萬…有餘啦。至於樓價方面，一日中環啲房仔都仲可以租到萬幾蚊（經濟好的現象），一日樓市都有承接；幾十萬至百幾萬都好多選擇，唔使一定要住啲新嘅縮水樓。」
另一位網友hkddt就滿腔怨氣話︰「拎綜援嘅，就唔使搵錢養仔女，愈多子女收入愈多，亦都唔需要驚瞓街，又大又新嘅公屋免費畀佢哋住。」
唔知曾特首聽到班網友咁講，會唔會同家計會合作拍過另一段教人「廉價」養仔嘅廣告，一於撼低李麗珊，平息大家嘅疑團兼怨憤呢？