「公益金國金二期慈善跑2006」12月3日揭開戰幕，噚日舉行記者會，仲搵嚟將會第二次參加比賽嘅金管局總裁任志剛，為大賽作呼籲兼打氣。
任總話，兩年前第一次參加，佢以28分鐘多啲嘅時間，跑完88層樓高，佢畀參賽者貼士，就係保持身體健康，做多啲運動，將身體狀態保持好啲就得，佢仲好風騷咁話：「唔係好難啫，我近60歲都做到。」不過，要佢今次贏就好難，志在參與做善事為公益。
今次慈善活動主要為公益金資助肢體傷殘人士服務籌款，分機構賽同個人賽，機構賽嘅企業要籌到六萬八蚊組成至尊隊，或三萬八蚊組成愛心隊，就可以派出四名健將以接力賽形式跑上88樓；個人組只需籌得1000元就可以參加。