中區甲級商廈租金係咁升，迫咗好多租客外移去上環或者金鐘同灣仔區，間接推高埋呢幾區嘅租金，所以有啲租客決定租轉買，唔使睇業主面色。
中原香港商業部營業董事廖漢威報料，上環信德中心東翼低層04室，1109方呎，成交價約806萬，每呎約7268蚊。
買家本身租用中上環物業，幾個月前睇見張約就快滿，業主加租八成，所以嗱嗱聲搵地方搬，最後落實買番個單位自用。呢個單位擁正海景，仲係交吉㖭。
其實商廈租客租轉買呢個情況都出現咗一段時間，搬去隔籬區已係好平常，有啲索性跨區搬去九龍灣。廖漢威話早前呢類成交好活躍，近排已經少番啲嘞。
𠵱家業界開始睇淡未來商廈市道，又話中區以外地區嘅租金有機會回落，即係遲啲租客又可以唔使捱貴租，咁係咪意味租轉買潮就快完呢？