杜琪峯導演的電影《放．逐》於本周四上映，但該片因為戲中一個任達華和林家棟的握手動作被電檢處視為黑社會手勢，故影片需列入三級片，阿杜認為如此判決，令他感到很無聊及不公平。
任達華、黃秋生、吳鎮宇和張家輝等主演的《放．逐》，早前在威尼斯影展播映，反應不俗，香港映期安排在後日（周四）公映，但影片上映前卻因分級問題氣得導演杜琪峯「生蝦咁跳」，因影片中有一個鏡頭，是講述江湖大佬任達華與社團中人林家棟見面時，他們一個反手互握的動作被指是黑社會手勢，所以影片必須列作三級片，若要要以IIB上映，需刪掉這個鏡頭。
已做查證
「江湖叔父話唔係」
雖然寰亞和阿杜曾據理力爭，但電檢處不讓步，因該處曾請來黑社會專家觀看這部戲，認為這個握手動作確實是黑社會中人的打招呼手勢，為免對18歲以下青少年造成影響，所以影片無可避免要列入三級。電影公司在商言商，影片投資了4,000萬元，不想影片列入三級，少了觀眾入場觀看會影響票房收入，故明知導演不願刪剪，也得說服他接受，否則影片難以IIB上映。
記者昨日致電向阿杜求證，他說：「由頭到尾，呢部戲又唔係拍黑社會嘅嘢，所以呢個以左手反手嘅握手動作，只不過係為咗遷就鏡頭，但電檢處搵專家嚟睇話係黑社會手勢，呢啲真係冇得同佢哋拗，但我哋都搵過一啲江湖叔父睇過，佢哋話唔係，但電檢堅持認為係，唔剪就上唔到IIB，咁我都要顧吓投資者嘅利益，惟有好無奈咁接受。其實剪呢個鏡頭，對部戲劇情唔會話有好大影響，所以若因為個咁嘅鏡頭要變成三級片，我覺得幾無聊同唔開心，對我哋呢部戲都好唔公平。」
寰亞負責人莊澄對電檢處決定表驚訝，認為以一個連黑社會中人也不識的黑社會手勢就將影片列為三級，實在令人感到遺憾。他說：「呢個握手動作真係好多普通人都試過，一個咁普通手勢都話有黑社會成份，真係幾奇怪。我哋都有畀過一啲黑社會中人睇過，連黑社會中人都唔識呢個手勢，但電檢處嘅專家就話係，咁可能係遠古時代嘅黑社會手勢啦，但現代嘅人都唔識，咁仲當唔當係呢？」
首映足本
正場刪剪敏感鏡頭
今晚《放．逐》舉行首映禮，將會以足本放映給觀眾看，到後日開畫，握手鏡頭就會被刪剪，莊澄說：「聽日首映係公司包咗場，所以可以放足本都冇問題。不過我始終覺得如果政府係有心幫電影業，佢哋除咗搵專家去睇呢啲手勢外，係咪應該搵番一啲電影行業嘅代表去睇，咁樣可能睇嘢會比較客觀同睇得清楚啲，始終業內人士會較易明白電影所表達係乜嘢訊息。」
採訪：葉雪
