大賽日無論波友或者馬迷，都喜歡參與其中，但純粹從博彩角度，未必合乎個人心水出擊場次；反而緊守每個目標嘅出擊周期，「方」有贏錢之道。
馬會現時開盤嘅聯賽約有15個，即差不多接近300支球隊有盤賭（澳彩更不止此數），大家細想自己能對當中幾多支球隊有一定認識；個人投注前總會check吓場波有幾多傷停球員同埋未來賽事秩序，以信心度作最後評估，當然個人最堅持研究亞洲盤盤路走勢，不過範圍收窄至主攻每個聯賽數支爭標強隊而已。
同樣香港競賽馬匹逾千，單記馬名已消化不了，遑論熟讀每匹馬匹嘅底細同每次出賽走勢，所以個人多從騎練搏殺手法去推敲心水馬。
自己對大賽日下注不太熱衷，在足球來說，每個人都有至愛球隊，每次出場都會着緊非常，例如嚟緊禮拜日曼聯對利記，雙紅擁躉勁多，好多人不下注都會為她們忘情打氣，心跳加快；但形勢均等，實難言贏錢把握，這會是理想的投注場次嗎？其實是莊家的點心。
精采場次好睇唔好賭
跑馬亦然，好似剛過去禮拜日大賽日，入場名流打扮得花枝招展，賭客亦睇得賞心悅目，而最精采嗰場卻鬥到開大熱Q；但隨後3場賽事相反爆到七彩，能贏錢者佔絕少數，好睇未必代表贏到錢，將這類場次作重心，是否有捉蟲之嫌？方嘉柏馬房季初氣勢之超強，沒有幾人估到；下個主角會是那個馬房，目前只得1場頭馬嘅蔡廐同摩廐會在冬季發難追上，且看是否言中。
足球方面，歐洲頂級強隊可能受世界盃後遺症影響，不少未顯強隊本色，但一俟發難，贏盤率會重上5、6成以上，篇幅有限，留待下次再談。文：蘋果波神