墨魚呢期當造，白灼原條烚，頂盡都係薄切花枝片，老實感覺都係粗食、製法陳舊。「京木」老闆小馬哥話：「不如黑食啦……」乞食？「唔係叫你做九龍皇帝，係食得刁啲，用墨魚汁做日本料理。」墨魚汁食落夠鮮夠香，同日本魚生Crossover果然勁惹味，不過大家記得帶定支牙刷，因為呢度啲墨魚汁落得勁重手，食完驚你笑唔出，成棚牙黑晒吖嘛！
記者：朱崇德 攝影：譚盈傑
1.烏濃湯$35
1.擺上枱嚇到我死，黑漆坑渠水伸出烏賊鬼手，唔講仲以為去咗哈囉喂。老火奶白魚湯做底，清甜但嫌味道單薄，加墨汁即時變鮮。文哥話：「3斤重大墨魚嘅墨囊只可以做到2碗，墨汁落得好重手。」$35抵食！
2.碳冷麵$48
2.日本呢期潮食碳味食品，話有食療功效喎，真假我唔知，但呢隻日本空運到港嘅碳味烏冬就勁啱我胃口。碳味唔太重有少少香，滑不溜口係事實，配蟹柳同甜蛋助食，真係和味濃！汁醬用黑芝麻、黑醋加花生醬自己親手打，酸甜醒胃。
3.皇潮卷$28
3.黑食，唔只墨魚汁嘅！驟眼睇只係蟹柳、紅生菜、南瓜壽司卷，叻在有黑魚子鋪面，即時貴氣好多。點自製千島醬加南瓜汁，酸酸甜甜好醒胃。
4.珍寶蠔黑豆乳鍋$68
4.三隻手指咁大嘅美國鮮蠔，Size大到撐爆鍋面，嚇親！用勁有「營」嘅黑豆漿加日本麵豉做湯鍋底，滑口清甜。
5.水晶雲石2件$30
5.魚湯都可以做壽司？好高！斤半魚煮埋一碗魚湯，或者應該叫佢做魚膠；加魚肉、香葱絲、冬菇、甘笋再放適量魚膠粉，將之雪成魚凍，再厚切製成壽司，面頭放金箔，魚味比真魚生更香濃。
6.脆皮金目鯛$48
6.用春卷皮包住餡料輕輕炸一炸，餡料除甘笋、木耳外，仲加入香港日本料理店較少見嘅金目鯛，魚味濃兼爽口彈牙，普通春卷完全無得比。
7.雜錦壽司
7.一般壽司店老例要起孖，呢度嘅壽司可以單頭逐件叫。7吋長鰻魚同三文魚壽司每件$8，叫你去超市都買唔到啦！7吋長壽司仲有油甘魚（$15）、吞拿魚（$10）同牡丹蝦（$20），老闆話明成本價𠱁你翻兜幫襯，不過我願意中計。
和式人民食堂多人撐
九龍城食肆卧虎藏龍，有人報料話有間「京木」係和式人民食堂，7吋長壽司每件$8，仲要係日本飛機貨，完全唔要本嗰隻。唔信，扮食客，入去連喫佢4件食到飽，埋單，收錢嗰陣仲係咁多謝前多謝後，每件$8都有水位賺？老闆小馬哥話：「基本上係成本價，一毫子都無賺你，明博你返轉頭做熟客。」向現場熟客收風，知道老闆喺西貢自己有魚排，老本行，入貨當然又平又靚。「我自己喺日本有專人買手，香港一般日式料理好難食到嘅池魚、飛魚、眼仁奈同八角呢類上價活魚刺身，我呢度都有得賣。」逢周二、四、五都有飛機貨返，想食頭圍新鮮好嘢，記得呢幾晚落嚟打躉。
「用墨魚汁煮菜，可以話係食時令，你都見呢期好多人去釣墨魚啦。」不過就咁煮太普通，水上人覺得墨汁香得嚟同其他魚類勁夾，所以阿廚文哥諗到一系列墨魚汁菜。咪睇文哥咁後生，其實佢已經有14年煮日本菜經驗，佢喺日本會所餐廳出身，出品絕對正宗。講埋餐廳最搶手座位你聽，有心撐場記得坐壽司吧枱位置，好多熟客都鍾意邊食邊睇文哥刀功，飲得兩杯，嗲得兩嘴，記得叫佢切件大嚿啲吞拿魚腩送酒！
食客有Say
阿7
「個湯黑得幾恐怖吓，不過入口好鮮甜，幾正。」
阿君
「脆皮金目鯛幾得，炸咗做春卷魚味都仲好出。」
YamiB
「南瓜仔做碗好得意呀！我連瓜肉都食埋。」
Winnie
「$8件壽司，Lunch食3至4件當一餐都仲得。」
搵食攻略
京木日本料理（23823219）
地址：九龍城福佬村道5-9號地下D舖
營業時間：11:45am-2:30pm；5:45pm-11:30pm
交通：黃大仙地鐵站乘的士約$20，成龍居斜對面（近太子道西）下車
座位：40個
人均消費：$40-$100
最好賣：海膽焗飯、黃金燒帆立貝
註：以上菜式兩日前預訂