曾特首嘅二○○六年施政報告，中文版本寫得十分淺白，文字好通順，美中不足之處係有白字。左丁山急急翻閱一遍之後，就發覺第三十九段第四行：「照顧年幼孫子女等例子『彼彼』皆是！」左丁山素來寫開「比比」皆是，未見過「彼彼」皆是，請文字專家指教、指教。
施政報告Ｊ部講重視家庭，甚為虛無。中共第十六屆六中全會閉幕不久，提到將「建構和諧社會」寫入憲法，唔通曾特首早已與中央心有靈犀一點通？家庭和諧，社會和諧，屬整體社會文化建設，絕非法律可以解決，如果中共在最初三十年唔批鬥孔家店，准學儒家傳統，由幼稚園至高中都講授論語孟子大學中庸，中國人點會唔和諧、唔重視家庭呀？
施政報告第三十七段提出設立一個綜合、整體、高層次的家庭事務委員會，負責支援家庭的政策和措施。唉吔，香港已經夠多委員會啦，除有扶貧委員會、安老委員會、青年委員會、婦女委員會等等之外，再設立一個「家庭事務委員會」，益咗邊個？就係鍾意做公職、喜歡空談之人，浪費大量公務員（提供秘書支援）嘅寶貴時間。
即使一個高層次嘅「家庭事務委員會」能夠集思廣益，制訂政策，如何強迫子女養父母，孫兒唔打祖父或者老竇唔准包二奶呢？推到最後，政府係做socialengineering，變相干預市民生活，損害香港人嘅自由。
中國人好重視家庭。要父慈子孝，兄弟和氣，必須從教育做起，與社會福利署，家庭事務委員會無關。呢趟曾特首認真要「積極不干預」，唔好將家庭事件視為「大政府」責任。不如咁啦，特區政府將社會福利署有關家庭事務嘅預算削減一半，將啲錢撥畀教統局或各中小學校，作倫理教育之用，培訓四書五經、聖經、可蘭經、佛經嘅師資，喺學校廣化及深化道德倫理教學，持之以恆，十二年之後（六年小學、六年中學），學生嘅思想面貌會唔同晒，此乃長期治本之計。