鍾鎮濤（阿B）因為與前妻章小蕙欠下裕泰興財務2.5億元巨債，於2002年7月申請破產，同年10月獲批，今天阿B終於破產期滿，正式重過新生活。阿B將心聲製作成新歌《日日是好日》，慶賀重生，他謂破產後要做的第一件事是買六合彩，因為中獎可以全歸自己。
鍾鎮濤捱完四年破產日子，今天正式重生，愛音樂的他寫了新歌《日日是好日》，今日派台慶祝，與樂迷分享他的喜悅，其大女兒鍾嘉晴也畫了一幅太陽圖，祝父親往後每日都是晴天，阿B開心得將它用來作派台歌的封面。
「初期想死都唔得」
阿B表示《日》曲是其心聲，尤其歌詞中「恭喜我，最壞時候經已一一煞科」、「日日是好日，日日是好日，只需福星照我，開開心心我再求甚麼？」正是他近日的寫照。
阿B昨日說：「呢排身邊啲朋友知我就嚟破產期滿，見我就講恭喜，有啲仲話要同我慶祝，我真係好多謝佢哋，四年嚟多得啲好朋友支持同鼓勵，𠵱家終於撥開雲霧見青天。」
問阿B破產後要做的第一件事是甚麼？他笑說：「梗係買番兩張六合彩先啦，中咗係自己㗎嘛。」破產前陷人生谷底，現在如釋重負，阿B謂前後心情差天共地，他說：「破產初期真係想死都唔得，太多責任喺身，仔女又咁細，嗰陣日子唔易過㗎。」問他是否真有想過死？阿B說：「咁又冇，只係當時太黑仔，任何事都唔係自己可以控制，𠵱家總算捱過晒，可以開始過新生活，我一定會活在當下，活得更精采。」
生活簡單已滿足
經歷此事後，阿B自言學懂放下，他說：「放得下才會再有所得，我明白做人其實唔使咁執着，生活簡簡單單都可以好滿足。一直冇變過嘅係我永遠都咁鍾意音樂，所以將心聲寫晒入歌，預計11月出碟同大家分享。」
此外，阿B日前應朋友邀請到馬來西亞出席婚宴，他即席上台首唱新歌《日日是好日》送給一對新人，之後又與嘉賓合唱《ShaLaLa》。
撰文：丁寧