往往睇歐冠盃，驚喜萬分，因為可以認識多啲東歐球隊！假如真係上帝創造人，鋤強扶弱可能係佢建構人性最正氣一面。今晚我會為皇馬同AC兩支名牌球隊嘅對家打氣！
捧AC皇馬對家
求學時，經常響教授口中聽到一句說話：「霸住茅廁唔放便」（意即既無貨交，又不讓位與他人）；小弟不得不寫出！現今球壇，眼見好多千萬大軍，真係「霸」住歐冠盃呢個大舞台，但係原來冇乜貨交。就算唔係歐冠盃，本土聯賽都不知所謂！幾支所謂歐洲大球會，好似AC、皇馬、國米、曼聯同利物浦都傷透球迷心，如果可以選擇，希望佢哋歐冠早啲出局，畀啲機會其他球隊上位！
今晚AC同皇馬作客，雖然唔知主隊乜嘢料，但點都會捧主隊；而上周所見，AC同皇馬表現有如三流足球，兩隊目前嘅死穴就係前中後好似各自為政，無隊形。加埋歐冠盃主場威力超勁，AC皇馬班球星爭勝心不足。以上3個原因，我撐主隊！
細哨着火車仔門將荒
車仔1、2號門將受傷，歐冠盃上陣成疑，3號門將又唔知乜水，加上「細哨」對住西維爾又入兩球，連最唔在狀態嘅球星都無啦啦着晒火，車仔就算有「主場」都無用！
周鵬
商業1台《球迷集中贏》主持
電郵：[email protected]