港股上個禮拜五試衝萬八關，成交400億元，係挾倉嘅效果而唔係追貨嘅結果，大家應該睇得出嚟，唔係話個市炒上係虛火，而係啲股民無膽追。燦爛過後自然回歸平淡，昨日啲成交唔見一大截，得番290億元，恒指升咗21點，但係就好有象徵意義，因為終於企喺萬八樓上收市。
工行（1398）招股，國際認購反應咁熱烈，𠵱家港股啲散戶唔敢追貨，咁樣認購工行就變成一條好吸引嘅資金出路，睇嚟今次超額認購嘅倍數會比市場預期為高，如果掛牌前美股冇乜頭暈身㷫，工行掛牌日嘅升幅應該有兩成半或以上，入番張飛當抽獎都可以。
工行公開認購一開始，先前熱炒嘅國內銀行股即刻靜晒，班炒家可能真係想等隻工行掛牌先再炒過，啲錢轉咗去炒乜？睇番昨日國企股嘅成交，一樣縮咗好多，較明顯想郁嘅就係啲石油股，隻中油（135）走勢同成交都似樣，但係C輪得1隻，成交細，唔係太吸引，另一隻油股中石油（857）走勢都幾好，C輪嘅選擇好多，可以諗諗。
中石油C輪9171：隻中石油上個禮拜五異動炒上，食住期油想炒高個勢，昨日以大成交衝破條50日線，短線可上試9元，破位睇9.60元。隻C輪9171昨日報收47.5仙，升10.4%，照計就升唔夠數，正股今日再升，隻輪有機會升突，槓桿率17.9倍（有效10.1倍），引伸波幅26.7%，對沖值0.56，仲有80日先到期，溢價5.1%，正股升上9元，9171應該會升上75仙樓上，正股試9.60元，隻C輪應該唔會低過1.20元，正股低於8.38元沽出止蝕。
俊樺