真係人怕出名豬怕肥，當玖龍紙業（2689）董事長張茵未被選為中國首富前，真係想搵多篇有關佢嘅報道都好難，𠵱家呢，就差唔多日日都見到咁滯。噚日呢位紙品女王就接受咗內地報章《第一財經日報》訪問，大講佢嘅成功秘訣，同埋為被指為用人唯親的作風大平反。
醫生老公係商界人才
紙品女王話，佢做事一係唔做，一做就要做到最大，同電影《龍咁威》裏面龍威（鄭中基飾）嘅對白有九成似。佢同《第一財經日報》話：「如果一個行業我無法做到第一，我會選擇放棄。」佢話，當年就係抱住呢個理念，跳進中國造紙業呢個「藍海」，先至有今日成就。
對於喺上市時曾經已被指玖龍成個董事會都係自己人，原來女王到𠵱家仍然耿耿於懷。佢承認玖紙係家族事業，但強調公司唔係用人唯親。佢話若果真係用人唯親，就唔會佢有8兄弟姊妹，加上老公3兄弟姐妹，都只係得佢細佬張成飛做執行董事啦！
意難平的張茵仲講，原本做醫生嘅老公，都係因為被佢發現有商業才能，先至被拉入董事會咋！講多無謂，佢話睇玖龍紙業績表現，就知佢哋做得非常好啦！咁又係，全年純利升3.5倍，股價較招股價升1.7倍，相信若果年年都係咁好景，睇怕都唔會有人再出聲。